Јуниорите на стартот со првиот фаворит Шпанија
Миодраг Мицковиќ
Во следните неколку дена Македонија ќе биде домаќин на квалификацискиот турнир за Европското првенство во ватерполо за јуниори, кое ќе се одржи во септември во Истанбул, Турција. Во базенот „Младост“ во Скопје ќе настапат шест репрезентации: Македонија, Велика Британија, Словенија, Украина, Белорусија и Шпанија. Првите три екипи од овој турнир ќе се пласираат на ЕП.
Веќе десетина дена македонските ватерполо надежи интензивно тренираат во базенот „Младост“, имаа и неколку контролни средби со нашата „А“ репрезентација, која, исто така, во Скопје се подготвува за Европското првенство што ќе се одржи од 3 до 8 јули во шпанскиот град Малага. На стартот јуниорите вечерва во 21.15 часот ќе играат со најголемиот фаворит за првото место, Шпанија, а утре во 12 ч. со Белорусија и во 21 ч. со Велика Британија. В сабота е дуелот со Украина, а турнирот ќе го завршат против Словенија в недела од 12 ч.
Селекторот на нашата репрезентација Новковиќ верува дека македонските ватерполисти имаат сили да го обезбедат барем третото место во групата што ќе им обезбеди пласман на Европското првенство во Истанбул.
„Сигурно дека ватерполистите на Шпанија се најголеми фаворити за првото место, ние ќе се обидеме во борба со репрезентациите на Белорусија и Украина да го освоиме барем третото место бидејќи сметам дека Шпанија и Словенија се најсилни во нашата група.
За репрезентацијата на Македонија ќе настапат: Гојко Јаневски, Миле Белев, Милан Чолиќ, Димитар Димевски, Игор Милановиќ, Горан Никушев, Димитар Стојчев, Ѓорѓи Старделов, Никола Јосифовски, Мартин Никушевски, Стефан Лошковски, Андреј Клинчаров, Александар Ацовски, Анастас Белев и Дарко Недановски.
Турнирот ќе почне денес во базенот „Младост“ со почеток во 18 часот кога играат Велика Британија и Словенија. Потоа на програмата е средбата меѓу Украина и Белорусија (19.30). Свеченото отворање е во 20.30 ч, а потоа, ќе играат Македонија и Шпанија.
|
