Македонија остана на 56. место на ФИФА
На најновата ранг-листа која што секој месец ја објавува светската фудбалска асоцијација (ФИФА) Македонија за месец мај остана на истата 56. позиција. Нашите фудбалери според критериумите на ФИФА загубија седум поени, меѓутоа не доживеаја пад на листата. Имено, во мај избраниците на селекторот Катанец одиграа само еден контролен меч (нерешено 1:1) и тоа против подобро рангираниот состав на Полска во градот Ројтлинген во Германија што не беше доволно за нови поени и приближување на нашиот тим до Топ 50.
Од нашите противници во квалификациите за СП, и понатаму најдобро рангирана од групата е репрезентацијата на Холандија која се наоѓа на 10. место (холанѓаните во мај загубија 12 поени). Селекцијата на Шкотска падна за две места и сега е на 17. место на ранг-листата на ФИФА со загубени 29 бодови. Репрезентацијата на Норвешка е единствениот национален тим од групата кој во мај забележа позитивно поместување. Норвежаните се качија за две позиции и сега се наоѓаат на 27. место со 814 бодови. Најлошо рангиран состав од групата и натаму е селекцијата на Исланд која остана на 85. место на ранг-листата и во нејзиното најново издание. | 
