Полесно до бесплатна здравствена заштита

Само четири документи се потребни од вчера за добивање бесплатна здравствена заштита за категоријата граѓани кои немаат право на ваков тип осигурување. „Секој граѓанин, дури и оние кои немаат постојано место на живеење, без разлика на нивниот социјален статус или етничка припадност, имаат право на бесплатна здравствена заштита, која од денеска се добива по олеснета процедура“, изјави вчера премиерот Никола Груевски. Тој заедно со министерот за здравство, Бујар Османи, ја посети Подрачната единица на Фондот за здравствено осигурување, со цел да се уверат во поедноставената процедура. Според најновите законски измени, граѓаните ќе можат да остварат право на бесплатна здравствена заштита, доколку достават фотокопија од лична карта, здравствена книшка, извод од матична книга на родените и потврда од УЈП. Ова право во Скопје до сега го искористиле околу две илјади граѓани. Во Македонија, пак, има околу 35.000 луѓе кои немаат право на здравствена заштита. (Макфакс)