Упад на седница на Советот во општина Тетово

ТЕТОВО - Четириесетина вработени во јавното сообраќајно претпријатие „Полет“ во Тетово вчера упаднаа во големата сала на општината, запирајќи го почетокот на работата на Советот. Побараа нивниот проблем да биде ставен на дневен ред и да се донесе одлука за нивната судбина, бидејќи биле со статус на јавно претпријатие во компетенција на локалната самоуправа. „Ги молам советниците да ја разгледаат состојбата во која се наоѓа нашето претпријатие со над 70 вработени. Веќе 30 месеци не сме примиле плата, ниту за нас се плаќаат придонеси. И ние одгледуваме семејства, кои од нас очекуваат преживување“, им се обрати на советниците во салата Гани Ибраими, претседател на синдикалната организација на „Полет“, кој убедуваше дека собирањето било спонтано и оти единствено што знаеле било дека Советот одржува седница.

Претседателот на Советот, Ирфан Емини, информираше дека веќе било договорено работна група на највисоко ниво да го разгледа случајот со „Полет“, а на наредната седница да информира за состојбите и за можните решенија. (Г.Е.)