Аптеките вчера останаа затворени, а вработените револтирани ги зазедоа просториите на дирекцијата

Снежана Калабакова


Вработените во „Градски аптеки“ откако и по седум месеци не ги добија своите плати, вчера воопшто не ги отворија аптеките и од раните утрински часови влегоа и ги зазедоа просториите на дирекцијата. Таму останаа до попладневните часови, а потоа со транспаренти в раце излегоа на протест во строгиот центар на Скопје. Веќе еден месец телефоните во аптеките им се исклучени и тие немаат никаква комуникација. Како што рекоа, нивното координативно тело секојдневно ќе се состанува и ќе ги договара идните активности за да се сврти вниманието на одговорните кои досега требаше да им го решат проблемот. Тие тврдат дека судската извршителка Весна Младеновиќ до минатата сабота им ветувала дека се подготвува исплата на плати, а потоа од необјаснети причини се откажала од водење на случајот и вработените повторно не ги добиле заработените пари. Случајот, велат од „Градски аптеки“, е заглавен во правни лавиринти.

Во текот на вчерашниот ден во писмена своерачно потпишана изјава, Благој Механџиски, сопственик на фармацевтската куќа „Зегин“, која е акционер во „Градски аптеки“, посочува дека тој согласно со Законот за установи и Договорот за основање на „Градска аптека“, со оглед на донесената одлука, содружниците се согласиле на исплата на целокупниот заостанат бруто личен доход, заклучно со 31 август годинава. Исплатата, се вели во изјавата, можеле да ја реализираат по принципот „соодветно на сопственоста на уделите на ’Зегин – Механџиски‘ со 47 отсто и ’Фармакорп‘ со 50 отсто“. Притоа, додава дека тој се согласува на исплата на платите, доколку се согласат поранешните директори со статус на неотповикливи оставки, заверени кај нотар, да ги потпишат платните налози.

Поради неисплатените плати, вработените веќе се судираат со проблеми од егзистенцијална природа. Некои од нив веруваат дека им се врши современ мобинг, бидејќи постојано се под психолошки притисок. Велат никој не ги брка од работа, а доаѓаат да работат за без пари. Околу деведесет вработени, колку што останале, со гордост велат дека го носат белиот мантил и сакаат да работат, но за нив е срамно да имаат празни аптеки, во кои немаат ниту витамин Ц за пациентите, нема „кафетин“, „аналгин“, нема пелени „памперс“, кашички... и затоа има дневен пазар од 60 денари и нема плати. Голем број од нив велат веќе не можат да си ги плаќаат сметките, да ги враќаат ануитетите за кредити по разни основи, немаат покритие за ратите на кредитните картички, а некои немаат повеќе средства ниту за да го платат превозот до работа.

„Редно е да им го свртиме вниманието на одговорните, на оние што не' донесоа на ова дереџе и секој ден ќе протестираме. Нашите семејства дома се без леб, ни се книжат камати врз камати и телефоните ни се исклучени.

Не функционираат законите, иако реагиравме, веќе осми месец нема плати. Брендот згасна, а честа и името на ’Градски аптеки‘ го ставија во кал“, рече на протестот вчера Љубица Христовска, вработена во „Градски аптеки“.