| Во Хераклеја ќе продолжат ископувањата
БИТОЛА - Речиси еден месец по прекинувањето на ископувањата во античкиот локалитет „Хераклеја Линкестис“ покрај Битола, и гласините дека парите за истражувачкото истражување се предвреме истрошени, министерката за култура Елизабета Канческа-Милевска вчера лично дојде во Битола за да ги демантира гласините. Министерката категорично вели дека ископувањата имаат динамика и дека ќе продолжат во септември со истите сили. Таа вели дека државата само за Хераклеја досега потрошила 20 милиона денари. Без оглед на економската криза и евентуално новиот ребаланс на буџетот, Министерството за култура има пари да продолжи со истражувањето во Хераклеја.
„Финансиите не се проблем во Министерството за култура. Во делот за заштита на културното наследство имаме обезбедено средства. Досега се потрошени 20 милиона денари, а за ископувањата кои ќе продолжат во септември се предвидени уште 10 милиони денари, така што нема да има ниту намалување на кадарот. Повторно ќе бидат ангажирани истите 400 луѓе“, изјави Канческа-Милевска во Битола, по посетата на локалитетот Хераклеја.
Таа е задоволна од досегашните истражувања на овој антички локалитет. „Откриени се повеќе од 2.000 движни предмети. Откриени се бедемот, кружната кула и ранохристијанска базилика, што се врвни резултати кои, се надеваме, ќе дадат насока за понатамошните истражувања. Во август на луѓето ќе им се даде одмор, а од септември повторно стартуваме“, додаде министерката. Таа беше во друштво со првиот човек на Управата за културно наследство, Паско Кузман. (А. Б.) |
