Три беровски фирми пријавени за загадувањето на Брегалница
Иван Бојаџиски
Штип - Свињарската фарма на АД „Жито Малеш“ го предизвикала загадувањето на водите на реката Брегалница на потегот меѓу малешевските села Будинарци и Митрашинци, што се случи на 19 минатиот месец и за тоа свое злосторство против природата заработи прекршочна пријава. Државниот инспекторат за животна средина најави прекршочни пријави и за текстилната фабрика „Алкалоид“ и за рудникот за јаглен „Брик“, и двете од Берово, поради континуирано загадување на најголемата река во Источна Македонија, односно непочитување на прописите за заштита на животната средина. Според Фируз Мемед, директор на спомнатиот Инспекторат, за ваков вид прекршоци казните се движат од 8.000 до 20.000 евра за правните субјекти, односно од 1.400 до 2.500 евра за раководните лица.
„Беровската свињарска фарма, која е со капацитет од 15.000 грла, отпадните води ги собира во три земјени заливи и на истата, во претходниот период, повеќе пати и доставувавме решенија за преземање мерки за спречување на загадувањето на Брегалница, бидејки таа е констатирана како потенцијален загадувач на оваа река. Констатиравме дека критичниот ден, поради обилните врнежи од дожд, заливите се преполниле и се излиле во Брегалница, во чии води било утврдено зголемено количество азот и фосфор и зголемена потрошувачка на кислород за над десет пати. Во исто време, од повеќе места добивавме информации дека водите на оваа река биле загадувани и над локацијата на која се наоѓа свињарската фарма. Со земање мостри утврдивме дека мерките за заштита на животната средина не ги почитувале ниту текстилната фабрика ’Алкалоид‘, како и рудникот за јаглен ’Брик‘. Така, рудникот својата јагленов прав ја депонира на самиот брег на Дунковска Река, која се влива во Ратевска Река, а оваа во Брегалница. Јагленовиот прав слободно патувал низ речното корито, бидејќи не биле поставени задолжителните бариери. Од фабриката ’Алкалоид‘ во водите на Брегалница почесто биле испуштани обоени води од процесите на фарбање, на што малешевци подолго време укажувале“, вели Фируз Мемед.
Според членови на спортско-риболовните друштва од Берово и од Делчево, последното загадување на Брегалница го уништило целиот животински свет на потег долг четириесеттина километри. Фируз Мемед тврди дека сите правни субјекти, кои се лоцирани во близина на Брегалница, имаат обврска да постават пречистителни станици до 2014 година. Владимир Черкезов, државен инспектор за животна средина вели дека Брегалница некогаш била со загаденост од петти степен, а сега е со загаденост од втор степен до селото Оризари кај Кочани, односно трет степен од Кочани до влезот во Вардар. Но, позитивниот тренд не е резултат на зголемената совест за значењето на животната средина на газдите на објектите, туку на фактот дека од триесетина производствени капацитети на овие локации денес работат едвај од пет до шест.
|
