Педроса пред сите во Лагуна Сека
Прва победа на Шпанецот во Мото ГП по ланската во Барселона
Дани Педроса го прекина својот повеќе од едногодишен пост по славењето во Барселона во минатата сезона, триумфирајќи во трката во Лагуна Сека за Големата награда на САД во мотоциклизам. Шпанецот од Репсол Хонда стартуваше од четвртата позиција, но експресно изби во водство и во наредните 44 минути сите му го гледаа грбот во најсилната класа. По серија повреди тој конечно блесна, оставајќи го три стотинки зад себе Италијанецот Валентино Роси од Јамаха само поради тоа што се олабави во последниот свиок, а Хорхе Лоренсо исто така од Јамаха заврши трет. За Лоренсо ова е одличен пласман имајќи ја предвид повредата на клучната коска што ја доби веднаш по освојувањето на пол-позицијата во квалификациите, а за чие санирање треба околу шест недели!
Четвртото место го освои светскиот шампион од 2007 година, Кејси Стоунер, за кого ова е само втор пласман надвор од подиумот сезонава. На Австралиецот, кој го возеше резервниот мотоцикл, во последните кругови почнаа да му се доближуваат бившиот светски првак Ники Хејден и Тони Елијас, но премногу заостануваа за да го загрозат. На Хејден, кој ја освои титулата во 2006, ова му е прв пласман меѓу најдобрите петмина по доаѓањето во Дукати.
По својот седми подиум во осмата трка сезонава (во Ле Ман беше 16.), Роси на ГН на Германија во Заксенринг на 19 јули патува со 151 бод, девет повеќе од Лоренсо во вкупниот поредок и 16 во однос на Стоунер на третото место. Педроса со победата во Лагуна Сека се искачи на четвртата позиција со 59 бода помалку од лидерот и бранител на титулата.
Пласман во Лагуна Сека: Педроса (Шпанија/Репсол Хонда) 44:01,580 мин., Роси (Италија/Фијат Јамаха) +0,344 сек., Лоренсо (Шпанија/Фијат Јамаха) + 1,926 сек. итн.
Вкупен поредок: Роси 151, Лоренсо 142, ��тоунер 135 итн. |
