Гром остави на улица семејство од Бела Црква

Силен пожар избувна во куќата на семејството Кочоски, кои останаа и без реколтата од 1.000 тони тутун

Моника Талеска



ПРИЛЕП - Семејството Кочоски од прилепското село Бела Црква остана без куќа, без целата покуќнина и годинешната реколта од 1.000 тони со тутун во пожарот што избувна завчераутро. Во кобниот час, сите шест члена од семејството спиеле во куќата кога силен гром удрил во покривот, предизвикувајќи пожар во собата каде што спиело едно од децата. Силниот татнеж ги шокирал. Исплашени, тие притрчале во собата каде што бил синот и го извлекле надвор.

„Како атомска бомба да падна, толку беше силен звукот. Прво мислевме дека гром удри некаде во близина, но кога викна синот, влеговме во неговата соба, а оттаму излегуваше пламен и чад. Тој во шок седеше на креветот, го извадивме, но сите бевме вознемирени и во паника“, вели Рубин Кочоски (41). Тој со својата сопруга, родителите и децата се обиделе да спасат дел од покуќнината, но попусто. Напомош притрчале соседите.

„Дојдовме да им помогнеме со црева и кофи, туравме вода, го гасневме огнот, но ништо не успеавме да спасиме. Јавивме и во Пожарна, ама додека да дојдат од градот, помина еден час. Кога дојдоа пожаникарите, веќе беше доцна. Луѓето останаа без ништо“, сочувствуваат со нив селаните и велат дека никој од Општина Кривогаштани не дошол да ги посети и да им понуди помош.

„Соседите ни помагаат во се', не' викаат кај нив да преноќеваме и децата ги згрижија да не останат на улица, но не е еден ден. Сега немаме ништо, немаме работа, немаме пензија, пари... живеевме од тутун и нешто градина, се надевавме дека со предавање на тутунот ќе собереме пари за да го продолжиме школувањето на децата, ама сега немаме ни денар скршен“, вели мајката Оливера Кочоска.

Таа апелира до сите институции во Општината, во државата, до поединци и фирми, кои се во можност да им помогнат за да преживеат, за да врзат крај со крај.