Бензините поскапуваат, дизелот со иста цена
Бензините од денеска поскапуваат за половина и за еден денар, а цената на дизелот останува иста, одлучи вчера Регулаторната комисија за енергетика (РКЕ). Според одлуката, се врши зголемување на рафинериските и на малопродажните цени на нафтените деривати во просек за 2,03, односно за 1,20 отсто.
Малопродажната цена на „еуросупер 95“ и на моторниот бензин МБ-96 се зголемува за половина денар за литар, а на „еуросупер 98“ за еден денар за литар, во споредба со цените пред две недели. Така, новата цена на „еуросупер 95“ изнесува 56 денари, „еуросупер 98“ ќе се продава за 57,50, а МБ-96 за 59 денари за литар. Цената на „еуродизел (Д-Е 4)“ и на екстралесното масло за домаќинство (ЕЛ-1) не се менува и тие и понатаму ќе се продаваат за 44,50, односно 33,50 денари за литар.
Со одлуката на РКЕ, за 0,958 денари за килограм се зголемува цената на мазутот М-2, кој од денеска ќе се продава по 20,376 денари.
Како причина за зголемување на цената на горивата се истакнува за 3,41 отсто повисоката просечна цена на суровата нафта во изминатите две недели, како и понискиот курс на доларот. (МИА) |
