Како се намалува невработеноста во земјава за време на криза?
Иако се затвораат фирми според Агенцијата, во април има помалку невработени за 1.399
Маја Томиќ
Во целиот свет, како последица на кризата, досега милиони лица ја изгубија работата. Според најцрните прогнози на Меѓународната организација на трудот, до крајот на годинава 50 милиони луѓе ќе останат без работа, а 200 милиони ќе паднат во сиромаштија. Наспроти овие глобални текови, во Македонија има обратен процес - паѓа невработеноста.
Според Агенцијата за вработување (АВРМ), на крајот на април бројот на невработените изнесувал 349.879, што е за 1.399 лица помалку отколку претходниот месец, кога невработените броеле 351.115. Во АВРМ забележале дека од вкупната бројка невработени, активно бараат работа 278.644 лица, додека остатокот се водат како невработени само заради добивање здравствено осигурување.
Покрај фактот дека со стапка на невработеност од 33,8 проценти остануваме на врвот меѓу земјите во Европа, дополнителен проблем се фактите дека околу 130 илјади лица од вкупно невработените се на возраст од 20 до 34 години, како и тоа што 105 илјади невработени чекаат на работа осум и повеќе години. Од вкупно невработените, без образование или ниско квалификувани се дури 172.440 лица.
Официјалните податоци за опаѓање на невработеноста се сосема спротивни на реалната економска слика, уште повеќе поради тоа што и во февруари годинава статистиката регистрира намалување на бројот на вработените во индустријата за 10 отсто, во однос на истиот месец 2005 година. Од лани есента наваму, најмногу компаниите од металскиот сектор, од текстилната и од кожарската индустрија постојано прогласуваат технолошки вишоци или ги праќаат вработените на принуден одмор. Според анализите на Сојузот на синдикатите, до крајот на 2008 година околу 20.000 лица или се останати без работа или се упатени на принуден одмор поради намалување на обемот на производството во компаниите, а како последица на откажувањето на нарачките од странство и неповолните цени на светските берзи. Бизнисмените неодамна прогнозираа дека оваа ситуација ќе потрае и во наредните месеци, што ќе значи натамошна криза на пазарот на трудот и продолжување на губењето на работните места.
Затоа, луѓето од бизнисот заедно со Синдикатот побараа поинакви мерки од Владата кои можат да ја сменат состојбата. Според нив, неопходен е свеж капитал за компаниите да го заздрават производството и да го стопираат процесот на отпуштање работници. Во трите последни пакети-мерки на Владата за ублажување на економските последици од кризата, за проблемот со губењето на работните места не беа посочени конкретни идеи. Всушност, Владата досега главно посочува дека невработеноста ја решава со активните политики на вработување, преку Националниот акционен план, што засега има мали ефекти.
Половина милион невработени во БиХ
Сараево - Околу половина милион луѓе се водат како невработени во Босна и Херцеговина, се наведува во извештаите на државната Агенција за вработување, издадени за март годинава.
Само во првите три месеци од годинава, без работа останале околу 35.000 луѓе, а до крајот на годината истата судбина ги очекува уште најмалку толку вработени, предупредуваат домашните експерти.
Стапката на невработеност во БиХ во декември 2008 година била 40,6 проценти. Меѓу невработените поголемиот дел се жени. (Макфакс) |
