Јосипа Лисац

Раскошно музичко доживување

Големата музичка ѕвезда ја почести публиката во Скопје и со песната „Калино моме“

Хрватската музичка ѕвезда Јосипа Лисац, која во Скопје завчеравечер по речиси десет години пауза, одржа концерт пред полна Универзална сала, на публиката и понуди раскошно музичко доживување. Облечена во очекувано интересна креација, која ја нагласуваше нејзината грациозност, таа истовремено ја создаваше и со членовите на бендот ја делеше атмосферата на сцената, суверено држејќи го фокусот на вниманието од почетокот до крајот на концертот.

Исклучителните вокални способности по кои е позната Лисац уште од почетоците на својата богата кариера и овој пат се потврдија преку изведбите на нумери од различни жанрови и периоди, а ги воодушеви присутните и со песната „Калино моме“ што премиерно во живо ја изведе со специјалниот гостин Гарбарет Тавитјан. За песната рече дека прв пат чула кога и' било понудено да ја испее во рамките на проектот „Македонското срце чука во 7/8“, што минатата година Гаро го реализираше со своите два сина.

Неповторливата во изразот, Јосипа Лисац изведе неколку нумери од својот последен албум „Живеам по свое“, објавен минатата година, а ја потсети публиката и на претходните настапи преку изведба на повеќе стари хитови, но и преку шеговитите забелешки за непроменетата состојба во Универзална сала.

Релаксираната и задоволна публика ја прими, но и ја испрати како близок и длабоко почитуван уметник. (К.Б.)