ЕДИТОРИЈАЛ

Обвинителството на тест

Гордана Дувњак

Македонската лексика секојдневно се збогат��ва со нешто што може слободно да се нарече „институционална фразеологија“. Ако веќе навикнавме дека полицијата работи „согласно со законот“, а судот во истражната постапка не може да открива детали, бидејќи „истрагата е во тек“, која е тогаш омилената фраза што ја користат нашите обвинители?

Веројатно, нешто од типот дека „секој предмет за нив има еднакво значење и ќе добие ист третман, како и сите други“. И добропознатата и универзална реченица дека криминалот не познава вера, нација и партија.

Но, дали е тоа навистина така?

Колку и обвинителите да се трудат да ја релативизираат „посебноста“ на некои предмети и да тврдат дека не им е важно кон кого е насочена истрагата, дури и да сакаат, тоа не можат и да го направат.

Државниот јавен обвинител Љупчо Шврговски деновиве е чест гостин во медиумите. Не помалку присутен во јавноста е и скопскиот јавен обвинител Марко Зврлевски, а со наменска изјава се јави дури и обвинителот за организиран криминал Јован Илиевски, кој ретко имаме прилика да го видиме во медиумите.

Од морето кривични пријави и „допрени гласови во јавноста“, сепак, интересот на седмата сила, главно, е насочен на две мегаафери. Едната, поврзана со висок функционер на опозицијата, наречена „Надеж“, а другата со начинот на функционирање на власта, која се однесува на трошење државни пари за партиски кампањи.

Новинарите живо ги интересира како ќе постапи Обвинителството по иницијативата поднесена од Антикорупциската комисија, која побара да се преиспита дали поранешниот шеф на државата и актуелен лидер на опозицијата, Бранко Црвенковски, без тендер ненаменски потрошил 300.000 евра. Пари кои, наводно, легнале на сметка на тројца словенечки експерти што му нуделе совети како полесно да ја урне власта.

Не помалку интересно за јавноста е да се види и дали Обвинителството ќе загризе на мамецот што го фрли сопственикот на А1 телевизија, Велија Рамковски. Бизнисменот кој деновиве е „предмет на обработка“ од Финансиската полиција и инспекциите, кои ја проверуваат легалноста на неговите фирми, во интервју за сопствената телевизија се обиде вниманието да го насочи на друга страна. Удри во најчувствителната точка на владејачката ВМРО-ДПМНЕ, која се обидува да се прикаже како безгрешна и некорумпирана партија. Рамковски тврди дека иако цели три години неговата телевизија им нудела големи услуги на Владата и на партијата, Груевски му останал должник за неколку милиончиња евра. Газда Велија дури и јавно кажа дека дел од партиските реклами биле плаќани со државни пари, но, како што рече, „криминалот го правеше Груевски, а не јас, мене ми беше битно да ми платат за рекламирањето“. Ја обвини партијата на власт дека му платила само 370.000 евра, а според ценовникот и минутажа, наводно, побарувал близу 5 милиони евра.

И покрај тоа што Обвинителството јавно го повика Рамковски лично да им ги достави доказите, изгледа дека тоа не му паѓа напамет на медиумскиот газда. Рамковски ќе чека обвинителите сами да го повикаат и да соберат податоци, а дотогаш најавува дека документите ќе ги доставел до Канцеларијата на Европската комисија.

Сега на потег е Обвинителството. Без оглед дали овие предмети ќе ги работи скопското Обвинителство или специјалното обвинителство, она што се очекува е да бидат темелно проучени и обработени. Без пристрасност, тактизирање, без желба за забошотување или, пак, за откривање вина таму каде што нема место. Само на тој начин Обвинителството ќе добие вистинска почит и ќе ја оствари својата уставна улога и нема да биде нечија политичка маша.