Кршење на стандардите

Секаков вид комерцијално огласување, кое не е јасно издвоено од информативните содржини во медиумите, се смета за грубо кршење на професионалните стандарди.

Ова е предупредување на Советот на честа при Здружението на новинари на Македонија (ЗНМ) по повод „се' позачестените случаи на директно, но и на прикриено рекламирање под маската на информирање“.

Во соопштението објавено денеска, како пример се посочуваат „многуте прилози и текстови за ’успешните‘ приватни универзитети, новите производи или услуги на одредени компании кои станаа редовна и, за жал, не осамена појава. Под таквите ’прилози‘ неретко се потпишани конкретни новинарски имиња“, се наведува во соопштението.

Советот на честа потсетува дека согласно со член 6 од Кодексот на новинарите, рекламата и прикриената реклама мора да бидат јасно одделени од новинарската содржина. (Макфакс)