Коло на победи за Македонците во Белград

Четири победи и едно реми е билансот на петтемина македонски претставници во седмото коло на 22. „Трофеј на Белград“, со награден фонд од околу 7.000 евра. Велемајсторот Звонко Станојоски (рејтинг 2509) на две кола до крајот со 5,5 поени е на делба на третото место во конкуренција на 213 учесници откако својата четврта победа на опенот што завршува денеска ја забележа со бели фигури против интермајсторот Богомил Андонов (2276) од Бугарија.

По цел поен освоија и ФИДЕ-мајсторите Ристе Менкиноски (2326) и Зоран Илиќ (2283), како и Драгана Николовска (1695). Менкиноски со црни фигури го совлада Србинот Мирослав Томиќ (2139), а Илиќ беше подобар со бели од Стеван Рајчевиќ (2153), па обајцата со по 4,5 поени се на делба на 35. место. Николовска, пак, со бели го победи Гојко Вучиниќ (2011) и со 3,5 поени го дели 95. место.

Единствен што не победи е Роберт Велески (2280). Тој ремизира со бели со Слободан Кузмановиќ (2146) и со четири поени го дели 57. место.

Четвртото коло на опенот „Медитеран 2017“ во Риека, со награден фонд од 16.000 евра, не беше многу успешно за двајцата учесници од Македонија. Интермајсторот Орце Данчевски (2418) со црни фигури фигури го подели поенот со Хрватот Деан Клобучар (2174) и со 2,5 поена е на делба на 30. место меѓу 136 шахисти. ИМ Марјан Митков (2395) со црни загуби од Норвежанецот Кои Гандруд (2143) и со два поена е на делба на 56. место. (Р.Д.)