Мерион Џонс почна да тренира кошарка

Поранешната спринтерска звезда, Мерион Џонс (34), почна да тренира кошарка во екипата на Сан Антонио Силвер Старс. Нејзина желба е да се занимава со тој спорт професионално, за почеток во Европа, а потоа и во САД.

Џонс во лани во септември одлежа шестмесешна затворска казна поради давање лажни искази по заклетва во допинг аферата БАЛКО и во аферата за банкарска проневера во која беше вплеткан и нејзиниот партнер, Тим Монтгомери. За њујоршки „Тајмс“ изјави дека во моментот работи со помошните тренери на Сан Антонио со надеж дека наскоро ќе може да заигра во некој од европските клубови, а од наредната сезона и во американската женска професионална кошаркарска лига.

„Мислам дека ова може да биде интересно искуство“, рече поранешната спринтерка која се занимаваше со кошарка и во студентските денови на Универзитетот Северна Каролина.

„Кошарката може да ми овозможи да пренесам порака на младите и да добијам нова шанса“, вели Џонс.

Откако призна дека употребувала допинг во октомври во 2007 година, иако години и години демантираше такви нешто, Џонс остана без три златни медали (100 метри, 200 метри и штафета 4х100 метри) и без две бронзени (скок во далечина и штафета 4х400 метри) што ги освои на Летните олимписки игри во Сиднеј во 2000 година.