Партизан казнет со 15.000 евра

Белградски Партизан забележа голема победа во минатото коло во Евролигата на домашен терен и тоа над Олимпијакос, но експресно стигна казна од раководството на ова натпреварување и последно предупредување за играње пред празни трибини.

За време на мечот со Олимпијакос фановите на „црно-белите“ фрлаа предмети на теренот поради што клубот ќе мора да плати казна од 15.000 евра. Белграѓани го добија натпреварот со 86:80 меѓутоа судиите и делегатот не пропуштија прилика да поднесат детаљен извештај кај своите надлежни лица. Гостинските кошаркари беа гаѓани со парички, запалки, пенкала и хартиени топчиња, а едно слободно фрлање на тимот од Пиреја мораше да се повтори, откако едно такво топче заврши во главата на Халперин. За смирување на страстите на трибините не помогнаа ниту апелите на домашниот тренер, Душко Вујошевиќ.

Раководството на Евролига објави и дополнување на паричната казна, па во случај да се повторат вакви или слични инциденти во Белград, Партизан ќе игра пред празни трибини.

Денеска Партизан гостува во Малага кај Уникаха, а на 10 декември го пречекува турски Ефес Пилсен.