Фудбал

Македонија во Глазгов е поразена од Шкотска со 2:0.

Глазгов, 5 септември (МИА) – Фудбалската репрезентација на Македонија попладнево во Глазгов е поразена од Шкотска со 2:0. Со овој пораз македонската селекција ги загуби шансите да се бори за учество во бараж-натпревар на Светското првенство што во 2010 година ќе се игра во Јужна Африка.
Македонските фудбалери одлично го отворија натпреварот и создадоа три големи шанси и повеќе полушанси но не успеаа да го совладаат одличниот шкотски голман Гордон. Најголемите шанси за гол ги имаше Горан Пандев но во 11, 44 и 51 минута домашниот голман ги одбрани неговите удари, а Славчо Георгиевски во 64 минута од идеална позиција шутираше над голот на Гордон и не успеа во тој момент да го израмни резултатот. Шкотите ги искористија нашите промашувања и со головите на Браун во 56 и Мек-Фаден во 81-та минута стигнаа до победата која ги остава во игра за второто место во групата 9.
На табелата води Холандија со 21 бод, втора е Шкотска со 10, Македонија остана на 7, Норвешка има 6, а Исланд е последен со 4.
Вечерва од 20:45 часот играат Исланд и Норвешка.