Едиторијал

Партиjата е сила, незнаењето е моќ

Соња Крамарска

Знаењето е сила, знаењето е моќ - е кампањата на Владата за масовно образование на младите. Но, знаете ли што се случува зад овој слоган? Партијата е сила, незнаењето е моќ. ВМРО-ДПМНЕ одлучи сите наставници и професори кои не ја уживаат нивната партиска заштита да бидат отстранети од основните и од средните училишта, а на нивни места да дојдат членови на оваа партија и на „коалициските партнери“.

Оваа срамна партиска чистка се случи со помош на одредбите од Законот за вработување на определено време. Ви завршија договорите за работа на определено време, немаме законска обврска да ви ги продолжиме. Локалните комитети на ВМРО-ДПМНЕ беа со полни раце работа. Разни партиски моќници, некои од нив и со основно образование, решаваа до доцните ноќни часови кој професор или наставник ќе биде отпуштен. Направија и списоци кој треба да биде примен. Списоците му ги предаваа на градоначалникот, а градоначалникот на директорот на училиштето.

На местата на наставници и професори со положен стручен испит се примени кадри без таков испит иако според законите за основно и за средно образование е услов за изведување настава. Но, тоа на локалните шерифи, помогнати со благослов од партиската централа во Скопје, не им е важно. Важно е да се сместат партиските јуришници кои „трчале“ на последните локални избори и се заслужни за победата на градоначалниците и на ВМРО-ДПМНЕ.

Министерот за образование Никола Тодоров, иако во август ја обнови спогодбата со СОНК за продолжување на договорите за работа на наставниот кадар, бесрамно даде изјава дека „не може да им се меша на градоначалниците“ во изборот на наставниците. Да, градоначалниците се компетентни за избор на наставен кадар. И не само тие, туку и општинските комитети на ВМРО-ДПМНЕ. Какви процедури, какви комисии.

Своја улога во оваа чистка одигра и некогашниот борец за правата на просветарите Дојчин Цветановски. На избезумените истерани наставници тој по телефон им велеше дека ќе им помогне, а пред новинарите се обидува да ги прикрие случувањата. Дојчин Цветановски во оваа чистка застана на страната на партијата на власт.

Премиерот Никола Груевски и неговите соработници со полни усти демократија од Скопје зборуваат за крупните реформски чекори со кои ја водат Македонија кон Европа. Тие не ги слушнаа пукотниците во Гостивар кога еден директор на осново училиште застрела сопруг на истерана наставничка. Додека Груевски ги воспева демократските дострели на неговата влада, навечер тој и оние до него, ги креваат телефоните и тивко ги охрабруваат градоначалниците да ја вршат чистката.

Паднаа и жртви за демократијата. Во вистинска смисла. Директорот на едно основно училиште што се дрзна да не го прифати списокот на комитетот на ВМРО-ДПМНЕ за отпуштања и вработувања, следниот ден беше разрешен. Што се правата на директорот во споредба со правата на партиските јуришници и шерифи. Кои се неговите познавања од образо��анието во споредба со раскошните партиски перформанси на митингашите на ВМРО-ДПМНЕ.

Жално но вистинито, партиските чистки во образованието се случуваа пред очите на еврокомесарот за образование, Јан Фигел, кој деновиве беше во посета на нашата земја. Сардисан од сите страни со премиерот, претседателот и другите од ВМРО-ДПМНЕ и со убави вести за напредокот на образовниот процес во земјава, тој не ги виде вистинските случувања на теренот. Не е првпат.

Очајни, отпуштените наставници и професори седнаа да пишуваат тужби за политичка дискриминација. Никој не им даде друго објаснување зошто не им се продолжени договорите за работа. Иако сите знаат дека партиската комисија решила така. И покрај сите убави зборови за партиска непристрасност и политичка неутралност, во Македонија се случуваат погубни процеси. Партијата е сила, партијата е моќ.