Прво финале на Дејвис купот за Србија

Јанко Типсаревиќ стана нов тениски херој на Србија со победата над Радек Штепанек во решавачкиот меч, кој и' донесе триумф на неговата земја од 3:2 против Чешка и прво финале во Дејвис купот. Често непостојаниот Типсаревиќ го заокружи својот извонреден настап викендот, во кој славеше и над Томаш Бердих во петокот, декласирајќи го Штепанек со 6-0, 7-6, 6-4 и изборувајќи и' на Србија домашен дуел во финалето со деветкратниот освојувач Франција.

Во претходниот сингл во неделата Новак Ѓоковиќ го израмни резултат во натпреварот на 2:2 со победата над Бердих од 4-6, 6-3, 6-2, 6-2 по три часа и 14 минути игра пред френетичните 18.000 домашни фанови во „Белградска арена“. Потоа Типсаревиќ предизвика вистинска еуфорија во гледалиштето, оставајќи го на нула Штепанек во првиот сет, кој траеше само 23 минути и во кој противникот освои само седум поени!

„Ова е завршеток на мечот како од бајките. Морам да и' се заблагодарам на публиката за фантастичната поддршка, бидејќи таа не' врати од мртвите“, рече Типсаревиќ во емотивното обраќање од теренот.

Ѓоковиќ додаде: „Навивачите се тие што не' носеа во текот на целиот натпревар и кои ни помогнаа за пресвртот. Сега се насочуваме кон финалето“.

Типсаревиќ делуваше незапирливо кога поведе со 3-1 во вториот сет, но Штепанек се врати во мечот и се избори за тај-брејк, во кој Србинот мораше да спасува сет-поен пред да го освои сетот. Тој тргна фуриозно и во третиот сет, поведувајќи со 4-0, но противникот повторно се врати, а играта на нерви кулминира со двете спасени меч-топки од негова страна. Тогаш на сцена стапи публиката, која стоечки го проследи последниот гем и потоа со овации го награди својот херој.

„Многу сум горд од тоа што го постигнавме и почестен што сум претседател на овој тим“, изјави првиот човек на Српската тениска асоцијација, Слободан Живоиновиќ. Србија од 3 до 5 декември ќе ја нагости Франција, која во другото полуфинале ја збриша Аргентина со 5:0.