Претходен број

Нимиц се сретнал со Рен, но не и со Билд

Карл Билд негира дека дошло до средба, но вели дека Брисел е во контакт со Метју Нимиц

Од нашиот дописник
Слободанка Јовановска

Брисел - Метју Нимиц се сретнал со Оли Рен, но не и со Карл Билд, и тоа има повеќе врска со обидите на еврокомесарот да се информира изворно за текот на преговорите отколку што се обидува да го реши спорот околу името.

Како што ни потврдија од Кабинетот на Рен, еврокомесарот се сретнал со Нимиц во Њујорк за време на неговиот престој таму овој месец, без да наведат детали која е причината за тоа кога тој и сите функционери од ЕУ упорно повторуваат дека спорот за името е процес во ОН, а не во ЕУ.

Од Кабинетот на Карл Билд негираа дека до таква средба воопшто дошло, но неодамна шведскиот шеф на дипломатијата изјави дека Брисел е во контакт со Нимиц, иако не се обидува да влијае на спорот. Она што е сигурно е дека Брисел сака да биде во тек со преговорите, бидејќи од тоа какви се шансите да се дојде до решение ќе зависи и реториката кон нашата држава, во смисла дека Брисел нема да си дозволи недавањето датум да се поврзе исклучиво со спорот за името со Грција.

Дека спорот, колку и да се држи под површина, им виси над глава на еврофункционерите се гледа и од изјавата на Карл Билд вчера во која, зборувајќи за проширувањето во нашиот регион, ги спомена сите земји, освен Македонија.

„Југоисточна Европа чука на нашата врата. Србија има најевропски ориентирано раководство во својата историја. Косово е независна држава, а босанските политичари се препираат, но војната никогаш повеќе нема да биде опција. Хрватска прави значаен прогрес во преговорите за ЕУ, а Албанија изгледа одржа успешни избори деновиве. Патот до членство за сите нив, без сомнение, ќе биде долг“, изјави Билд, оставајќи да виси во воздух прашањето колку тој ќе биде долг за Македонија кога во ЕУ немаат храброст ни да ја споменат.

Дека ЕУ останува на ставот да го остави решавањето на споровите на инволвираните земји потврди и шведскиот премиер Фредрик Рејнфелд на средба со балканските новинари во Стокхолм. Според него, постојат очекувања дека некој ќе дојде однадвор и ќе ги реши билатералните спорови. „Важно е да се каже дека нема да дојде никој однадвор да решава што било ако двете земји не се подготвени да се придвижат напред. Тоа нема да се случи, иако постои тенденција да се очекува тоа“, рече тој.

Според него, за да бидат успешни проширувањата, важно е процесот да се темели на условувања. „Сепак, сакам да кажам дека не беше замислено билатералните прашања да бидат дел од тие услови, а гледаме тенденција земјите-членки да ги користат за да ги запрат приближувањата на други земји. Мислам дека тоа не е вистински начин како да се постапува“, изјави вчера шведскиот премиер. Тој објасни дека ЕУ е поделена околу проширувањето и дека околу сите прашања поврзани со него постојат билатерални спорови.

Билд, пак, им порача на Словенија и на Хрватска, чиј спор е многу повеќе во фокусот од тој на Македонија, јавно да зборуваат помалку, а повеќе да се посветат на тоа како да го решат спорот. „И на едната и на другата страна постои премногу јавна реторика околу спорот, што не ја олеснува ситуацијата. Понекогаш размислувањето е подобар политички инструмент од зборувањето“, рекол Билд.