Бензините поскапи од 1,5 до 2 денара

Поскапеа нафтените деривати. Малопродажните цени на бензините и на дизелот од денеска се зголемуваат од 1,5 до 2 денари. Според новата одлука на Регулаторната комисија за енергетика, за 1,5 денар поскапуваат Еуросуперот БС 95, Евродизелот и Екстра лесното масло за домаќинство. Новата цена на Еуросупер БС 95 ќе изнесува 68 денари, на Еуродизелот 57,5 денари, а на Екстра лесното 46 денари за литар.

За два денара се зголемува цената на Еуросупер БС 98 и ќе се продава по 70 денари за литар. Зголемување има и на цената на мазутот, кој ќе се продава по 32,251 денар за килограм.

Просечната цена на сурова нафта на светскиот пазар во изминатиот 14 дневен период изнесуваше 76,148 долари за барел и е за 2,8 отсто повисока од просечната цена по која беа формирани тековните цени на нафтените деривати. Курсот на денарот во однос на доларот во изминатиот период од две недели изнесуваше 48,3 денари и е за 0,43 отсто повисок од курсот по кој беа формирани досегашните цени. (Ек.Р.)