„Сковин“ ги поевтини вината

Во насока на поттикнување на потрошувачката на вино на домашниот пазар и како придонес во решавањето на кризата со откуп на грозје, винарската визба „Сковин“ одлучила да ги намали цените кај основната линија на своите производи, за повеќе од 20 отсто. Како што вчера соопшти компанијата, намалувањето на цените стартува со почетокот на сезоната на откуп. „Веруваме дека сите наши партнери непосредно ќе реагираат и ќе направат соодветна корекција на своите малопродажни цени“, велат од визбата.

Во „Сковин“ направиле и анализа дека најголемите производители на вино во светот воедно се и најголеми потрошувачи. Како пример ги посочуваат Франција со потрошувачка од 53 литри по жител, Италија со 50 литри и Шпанија со 33 литри. Но, Македонија е исклучок од ваквите трендови, со потрошувачка од само 7 литри пер капита. Една од причините за малото консумирање вино што ги наведуваат потрошувачите е недостапноста токму поради високите цени, па поради тоа во оваа винарска визба се одлучиле на ваков чекор, односно на намалување на цените на своите производи. (Ек.Р.)