„Диригент“ ја среди франкфуртската мафија

Во земјава се уапсени 29 членови на мафијата. Акцијата трае и во Германија и во Австрија

Горан Адамовски

Триесетина припадници на тн „Франкфуртска мафија“ се уапсени во вчерашната акција на полицијата во неколку градови низ земјава. Вчерашната акција „Диригент“,
спроведена во соработка со австрискките и германските служби, е продолжение на "Велес" што на почетокот од 2009 година беше реализирана во Австрија и во Германија.

Апсењата започнаа вчераутро во Велес, Свети Николе, Гевгелија и во Скопје, при што биле приведени 29 македонски државјани, за кои има индиции дека се дел од „Франкфуртската мафија“, која се занимава со
трговија со дрога, перење пари и сл.

„Пронајдени се поголема количина пари во готовина (главно евра) и помала количина дрога“, соопштија
од МВР. Уапсените биле однесени на распит во полиција, по што се очекува нивен распит пред истражен судија и кривични пријави.

Според неофицијалните информации што беа објавени во медиумите, меѓу уапсените се и велешанецот Зоран Манасков - Скршениот, кој заедно со Јордан Јодрановски - Ркулот, кој беше убиен во неодамнешното трикратно убиство во скопската населба Аеродром, се сметаа за водачи на оваа криминална група. Во ланската акција, Ркулот и Скршениот беа осомничени дека врбувале свои
сограѓани да продаваат дрога во Австрија и во Германија, но не беа обезбедени доволно докази за тоа.

Паралелно со акцијата во Македонија, операцијата „Диригент“ се одвиваше и во Австрија и во Германија, каде изминативе денови беа приведени неколку лица. За денеска, тамошните служби најавија прес-конференција.