Нови судири во Атина на денот на 24-часовниот генерален штрајк
Илјадници лица маршираа кон парламентот и ја обвинија владата на Караманлис дека е убиец
АТИНА - Демонстрантите вчера фрлаа молотови коктели кон полицијата распоредена пред парламентот за време на генералниот штрајк што ја парализира Грција и го зголеми притисокот врз конзервативната влада која се соочува со најжестоките немири во последниве неколку денцении. „Влада убијци!“ извикуваа демонстрантите, лути поради убиството на тинејџер од страна на полицијата што се случи во саботата, што пак ги предизвика четиридневните насилства поттикнати од бесот кај јавноста кој тлееше поради политичките скандали, зголемената стапка на невработеност и сиромаштијата. Илјадници лица маршираа кон парламентот на синдикалниот протест поради економската и социјалната политика, кои по кратко време станаа насилни. Полицијата употреби солзавец, а демонстрантите одговорија со фрлање камења, шишиња и употреба на метални прачки. Опозициската Социјалистичка партија соопшти дека владата, која има мнозинство од едно место и заостанува во анкетите, ја загуби довербата кај луѓето и повика на избори. „Учеството во штрајкот е апсолутно, земјата е во застој“, изјави Статис Анестис, портпарол на Федерацијата на синдикати ГСЕЕ, која повика на 24-часовен генерален штрајк. Авионите кои летаа на странски и домашни релации се приземјени, банките и училиштата затворени, а во болниците работи само службата за итна помош, додека стотици илјади Грци ги напуштија работните места.
Синдикатите соопштија дека приватизацијата, зголемувањето на даноците и реформите во пензискиот сектор ги влошија условите, особено за една петтина од Грците кои живеат под границата на сиромаштијата, во време кога глобалната криза и' нанесува штети на економијата во вредност од 240 милијарди евра. „Има барања за промени: социјални, економски и политички промени“, вели Одисеј Коракидис (25), кој работи на две места. „Тука не е невообичаено да се работат две работи за да се заработат 800 или 1.000 евра месечно. Во други земји тоа е несфатливо!“
Премиерот Костас Караманлис, кој дојде на власт благодарение на еуфоријата од Олимписките игри во 2004 година, апелираше до политичките лидери да се обединат и ги повика синдикатите да го откажат собирањето. Меѓутоа, неговото барање беше категорично одбиено од страна на опозицијата. „Тој и неговата влада се одговорни за распространетата криза што ја чувствува земјата, грчкото општество “, изјави портпаролот на Социјалистичката партија, Јоргос Папаконстантину.
Еден полицаец е обвинет за убиство, во врска со престрелката во која Александрос Григоропулос го загуби животот, но беше наведено дека тој само пукал во воздух. Балистичкиот извештај вчера требаше да биде обелоденет, а полицаецот да се појави пред иследниците заедно со неговиот партнер, кој пак е обвинет за соучесништво. Немирите поради смртта на тинејџерот почнаа во Атина во саботата и набрзина се раширија во најмалку 10 града низ државата, членка на ЕУ, со 11 милиони жители. Грците, исто така, протестираа и во Париз, Берлин, Лондон, Хаг и во Кипар. Безредијата, најжестоки во Грција од воената хунта во 1974 година, предизвикаа штета во вредност од повеќе од 20 милиони евра во уништени автомобили, запалени продавници и банки, откриваат осигурителните компании. Само во Атина, официјален претставник на општинските власти изјави дека 322 банки и бизниси биле оштетени, и бројката се' уште се зголемува. „Смртта на момчето е изговор што го запали огнот“, вели Јанис Томас (60), сопственик на продавница. „Денес сме поуплашени од кода и да е поради штрајкот“.
Вчерашниот штрајк огранизиран од страна на ГСЕЕ и синдикатот од јавниот сектор АДЕДИ, во кој членуваат половина од петмилионската работна сила во Грција, е најновиот во серијата работнички протести на синдикатите. Голем број продавници во централниот дел на Атина останаа затворени, со спуштени кепенци, спречувајќи дополнителни штети. Автобуските станици и кантите за отпад беа опожарени, јавните телефонски говорници уништени, а некои згради опустошени од огнот. Грција има традиција на насилни студентски немири и напади со молотови коктели од страна на анархистички групи, кои ги затегнаа тензиите со полицијата. Амнести интернешенел во извештајот од вторникот ја обвини полицијата за бруталност во справувањето со безредијата. Караманлис вети компензација за сопствениците на дуќани, но неговата влада веќе се соочува со голем дефицит. Во четирите години владеење на конзервативците се случија серија скандали, страшни пожари избувнаа минатото лето, а неуспешните економски мерки го збришаа оптимистичкото расположение од Олимписките игри во 2004 година. (Ројтерс) |
