Претходен број

Хрватската телевизија на столбот на срамот

Двете ѕвезди на ХРТВ во судир: Хловерка Новак- Срзиќ и Денис Латин

Латин обвинува дека од ХТВ се прави корумпиран медиум што ja штити мафијата

Тамара Грнчароска

Корумпираност, политичко полтронство, штитење на мафијата, нерационално трошење пари, се дел од обвинувањата кои стигнаа на адреса на Хрватската телевизија - ХТВ, упатени од еден од најпознатите хрватски новинари Денис Латин, авторот на најгледаната емисија на ХТВ „Латиница“.

Хрватската телевизија која го има реномето на најугледна и најпрофесионална државна телевизија во регионот, деновиве го преживува својот „столб на срамот“ откако Латин во едно свое интервју го обвини уредникот на Информативната програма на телевизијата, Хловерка Новак- Срзиќ, дека заедно со нејзините покровители „се обидува ХТВ докрај да ја престори во поданички, корумпиран, цензуриран медиум кој ги штити мафијашите и криминалците, продава телевизиски репортажи за големи пари, тргува со етерот и полни нечиј џеб“.

Клопчето на „професионалноста“ и „независноста“ на телевизијата почна да се тркала пред неколку дена откако градоначалникот на Славонски Брод, Мирко Дуспара, обелодени дека, за своја промоција, платил над 8.000 евра (58.000 куни) градски пари за да настапи во емисиите на ХТВ - „Бришан простор“ и „Отворено“.

Веднаш потоа уследи обвинувањето од Латин кој рече дека Новак- Срзиќ го казнила со намалување од 30 проценти од платата поради тоа што не ја почитувал нејзината забрана и во својата емисија го повикал новинарот на дневниот весник „Јутарњи лист“, Гордан Малиќ, како „експерт“ за мафијата. Шефицата на Информативната програма на телевизијата тоа свое барање го аргументирала со наведување дека Малиќ е „британски шпион“.

Латин го искористи случајот со Дуспара обвинувајќи го првиот човек на ХТВ, Вања Сутлиќ, дека од страв одобрува казнување новинари кои сакаат нормално да работат, а не сака да се занимава со корумпираните новинари и уредници кои продаваат емисии.

Целиот случај, кој по се' изгледа ќе добие и судска разврска, го разниша угледот на ХТВ, но и на Хловерка Новак-Срзиќ, која долги години котира високо со новинарските кругови во Хрватска, но и на која не и' е прв пат да биде, во негативен контекст, поврзувана со одредени политички и други влијателни кругови. Сепак, најголем удар доживеаја хрватските новинари на кои по убиството на новинарот Иво Пуканиќ, кој наводно бил поврзан со мафијата, им е ставена уште една црна дамка врз нивната објективност и професионалност.

Тоа можеби е причината поради која Хрватското здружение на новинари побара аферата за корупција и продажба на програмски простор на државната телевизија, која одекна во медиумскиот простор во регионот, да биде испитана од државното обвинителство и од полицијата, а од управата и програмскиот совет на ХРТ побара да го реши проблемот со цензурата во националната куќа.