Ракот ќе биде главниот убиец во светот до 2010 година
Дијагнозите на рак во светот се зголемуваат и годинава ќе достигнат бројка од 12 милиони
АТЛАНТА - Ракот ќе го преземе местото на срцевите болести како главен убиец во светот до 2010 година, како дел од трендот што до 2030 година ќе ги зголеми глобалните канцерогени заболувања и смртни случаи повеќе од двојно, истакнуваат меѓународни здравствени експерти во извештајот објавен во вторникот.
Се верува дека се' поголемата употреба на цигари во земјите во развој е огромна причина за промената, посебно во Кина и во Индија, каде што сега живеат 40 отсто од пушачите во светот. Исто така, една од причините е подоброто дијагностицирање на ракот, заедно со надолниот тренд на заразните болести кои беа водечки убијци во светот.
Дијагнозите на рак во светот постојано се зголемуваат и се очекува да достигнат 12 милиони оваа година. Глобалните смртни случаи од рак се очекува да достигнат седум милиони, укажува новиот извештај на Светската здравствена организација. Се очекува годишен пораст од еден отсто во заболувањата и смртните случаи, со уште поголеми проценти во Кина, Русија и Индија. Тоа значи дека до 2030 година веројатно ќе има 27 милиони нови случаи на рак годишно и смртни случаи до 17 милиони.
„Тоа ќе претставува неверојатен проблем на секое ниво во секое општество во светот“, смета Питер Бојл, директор на Меѓународната агенција на СЗО за истражување на ракот.
„Ракот е една од најголемите неописливи здравствени кризи на светот во развој“, истакнува д-р Даглас Блејни, новоизбран претседател на Американското здружение за клиничка онкологија. „Малкумина се свесни дека ракот веќе убива повеќе луѓе во сиромашните земји отколку ХИВ, маларија и туберкулоза заедно. И, ако продолжи сегашниот тренд на пушење, проблемот значително ќе се влоши“, додава тој. |
