Састре го обезбеди конечниот триумф на Тур де Франс
Шпанецот Карлос Састре го обезбеди првото место на годинашното издание на трката Тур де Франс откако на саботната 20. етапа, популарниот хронометар успеа да ја задржи предноста пред директните и најсериозни конкуренти Кајдел Еванс, Франк Шлек и Бернард Кол.
Поединечниот хронометар кој се вози во должина од 53 километри најбрзо го помина Штефан Шумахер, а Састре беше дванаесетти со две минути и 34 секунди заостанување зад победникот на етапата.
Сепак, и ваквиот лош пласман за шпанецот, беше доволен тој пред почетокот на последната етапа која се возеше вчера низ улиците на Париз и завршува на Елисејските полиња да ја зачува убедливата предност која ја стекна на најтешките планински етапи на Алпите.
Треба да се напомене дека Еванс беше главниот фаворит во саботната трка, меѓутоа тој на целта стигна како седми, со две минути и пет секунди заостанување зад победникот, со што не успеа да му се приближи на водечкиот во генералниот пласман.
Второпласираниот во генералниот пласман пред почетокот на 20.етапа Франк Шлек пак потполно разочара и стигна само до прескромното 54. време, што на крајот значително влијаеше на неговиот пласман. Имено, Шлек падна на шестото место во борбата за жолтата маичка.
Според сите прогнози на победничкиот подиум на годинашното издание на Тур де Франс, покрај двоецот Састре и Еванс ќе се најде и австриецот Бернард Кол кој претпоследната етапа ја заврши на деветото место, што на крајот му беше доволно да се пробие на третата позиција во вкупниот пласман.
Резултати 20. етапа:
1. Штефан Шумахер 1:03:50 часови
2. Фабијан Канчерала 21 секунда заостанување
3. Ким Кирхен 1:01 минути заостанување
4. Кристијан Вандевелде 1:05 минути
5. Дејвид Милер 1:37 минути
6. Денис Менчов 1:55 минути
7. Кејдел Еванс 2:05 минути
8. Себастијан Ланг 2:19 минути
9. Бернард Кол 2:21 минути
10. Џорџ Хинсепи 2:28 минути
Генерален пласман:
1. Састре (Шпанија) 84:01:00 часови
2. Кајдел Еванс (Австралија) 1:05 минути заостанување
3. Бернард Кол (Австрија) 1:20 минути
4. Денис Менчов (Русија) 2:00 минути
5. Кристијан Вандевелде (САД) 3:12 минути |
