Насловна

За независна Шкотска - два референдума

Лондон - За евентуална независност на Шкотска ќе биде потребно одразување не на еден, туку на два референдуми, изјави министерот за Шкотска во британската влада Мајкл Мор.

Според неговото објаснување, референдумот што би го организирала шкотската Влада би бил само „советодавен“, по што би уследил втор плебисцит, што би го организирала британската ��лада, со кој би можела да се определи иднината на овој дел од Велика Британија.

Изјавата на Мор за Би-Би-Си-Шкотска предизвика гневна реакција на Владата во Единбург, а првиот министер Алекс Салмонд го оквалификува ваквото толкување на плановите за отцепување како „бесмислица“, нагласувајќи дека може да има само еден референдум за независност.

Салмонд и неговата Шкотска национална партија (СНП) се заговорници за раскинување на повеќе од 300 години старата Унија меѓу Англија и Шкотска и за отцепување на северот од Обединетото Кралство.

Во претходниот мандат Владата на Салмонд не можеше да организира референдум затоа што имаше мнозинство од само еден пратеник во Парламентот, но по убедливата победа на мајските избори тој сега има доволен број пратеници за да се закаже референдум. Во Единбург се верува дека тоа ќе се случи во втората половина на овој четиригодишен мандат меѓу 2013 и 2015 година.

Според Мор, владата на Салмонд нема законска основа самата да прогласи независност на Шкотска, како и дека тоа може да се случи само со преговори со британската влада за изградба на заедничка платформа по ова прашање.

Премиерот на Шкотска Салмонд денеска престојува во Лондон каде во Даунинг стрит 10 разговара со британскиот премиер Дејвид Камерон. Главната тема на разговорот е унапредувањето на економијата во земјата, но се верува дека на средната ќе стане збор и за најавите за организирање референдум за шкотската независност.