Претходен број

Арачиновци побрзаа да ги платат сметките и добија струја

Охридска „Проаква“ плати дел од долгот, а ОХИС доби уште еден рок за плаќање

Маја Томиќ
Александар Пешев

Жителите на пет скопски села, меѓу кои и Арачиново, на кои завчера им беше исклучена струјата, од вчера повторно имаат електрична енергија. ЕВН- ЕСМ им ја вклучи струјата откако голем дел од жителите во текот на вчерашниот ден дојдоа во наплатните пунктови на компанијата и платија добар дел од задоцнетите сметки за електрична енергија.

„Ние не сме задоволни од методот на исклучување на цели села. Ако ЕВН-ЕСМ сака да оствари поголема наплата, нека оди од куќа до куќа, како што треба. Нивна работа е како ќе ја наплатат струјата. Но, ако повторно се случи исклучување на цели села и на Арачиново, ЕВН-ЕСМ ќе го дадеме на суд и ќе преземеме и други мерки“, изјави вчера Музафер Бесими, градоначалникот на Арачиново, кој додаде дека во последните два дена е зголемена наплатата на сметките за 30 отсто.

А, ЕВН-ЕСМ продолжува со акцијата за исклучување на неплаќачите. Наредната недела, како што дознаваме, ќе се исклучуваат водоводните и комуналните претпријатија низ целата земја поради големи долгови за струја.

Покрај општините, вчера не беше исклучена струјата на ОХИС и на охридска „Проаква“, иако имаа рок до завчера да го намират долгот за струја. На овие две фирми ЕВН-ЕСМ минатата недела неколку часа им ја исклучи струјата, како предупредување.

Во ЕВН-ЕСМ објаснуваат дека со ОХИС се преговарало за начинот на наплата на долгот од 500 илјади евра и дека од страна на фирмата, која е во државна сопственост, било ветено дека дел од долгот ќе се наплати до крајот на неделава, а дел во текот на идната недела. Од ОХИС информираат дека во последните неколку дена има интензивна комуникација со ЕВН-ЕСМ, со цел да се изнајде решение за наплата на долгот. Од компанијата немаа сознанија дали кај Владата има подготвеност за плаќање на сметката. Прашањето кој ќе го наплати долгот на ОХИС изгледа неизвесно.

„Владата секако размислува како да му помогне на ОХИС, но засега немаме конкретно решение како да се наплати долгот“, изјави вчера вицепремиерот Зоран Ставрески.

Од охридска „Проаква“, која е одговорна за снабдување на Охрид и на Струга со вода, а под нејзина ингеренција е и работата на колекторот за пречистување на Охридското Езеро, вчера информираа дека сите долгови на Охрид кон ЕВН- ЕСМ се намирени.

„Долговите за електричната енергија потребна за редовно водоснабдување на Охрид се платени. Додека за другите долгови во тек е подготвување на документацијата за наплата преку компензација. ЕВН-ЕСМ ја призна изградбата на трафостаниците како инвестиција на локалната самоуправа“, појасни директорот на „Проаква“, Бранко Трпчевски.

Од ЕВН-ЕСМ вчера изјавија дека очекуваат на сметката да легнат парите за дел од долгот на „Проаква“, кој изнесува околу милион евра. Инаку, на вчерашната средба меѓу претставници на локалната самоуправа на Охрид, „Проаква“ и ЕВН-ЕСМ, било договорено дел од долгот веднаш да се намири, а остатокот да се плати на рати. Нова средба со ЕВН-ЕСМ треба да има на 10 април, за да се оцени како се реализира договореното. Според градоначалникот на Охрид, Александар Петрески, бидејќи најголем дел од долгот на „Проаква“ е за потрошена струја за работата на колекторот, ќе се бара финансиска помош од Министерството за животна средина и за транспорт.

Во врска со акцијата на ЕВН-ЕСМ за исклучување на должниците, вчера со соопштение се огласи и народниот правобранител. Тој препорачува ЕВН-ЕСМ веднаш да прекине со противзаконската мерка колективно исклучување и да пристапи кон приклучување на корисниците кои редовно плаќаат сметки. Народниот правобранител смета дека наплатата на побарувањата треба да се врши согласно со Законот за енергетика и за облигациски односи.