Коичиро Мацура вети помош за културното наследство
Висока делегација на УНЕСКО предводена од генералниот директор во посета на земјава
Катерина Богоева
Високата делегација на УНЕСКО предводена од генералниот директор Коичиро Мацура која престојува во дводневна официјална посета на земјава, по повод синоќешното отворање на Регионалниот центар за дигитализација на културното наследство сместен во Музејот на современата уметност, вчера оствари средби со премиерот Никола Груевски и Министерот за култура Арификмет Џемаили. На средбата на високиот гостин и водечките личности од Регионалното биро за наука и култура – БРЕСЦЕ во Венеција, во Министерството за култура им беше изразена благодарност за укажаната помош и разбирање при реализацијата на иницијативите на Македонија во рамките на УНЕСКО, а гостите беа запознаени со тековните активности поврзани со проектите за заштитата на културното наследство.
На средбата во Министерството за култура преставници на Управниот одбор на Струшките вечери на поезијата го соопштија и името на носителот на Меѓународната поетска награда на Струга, која ја доделуваат заедно УНЕСКО и Струшките вечери на поезијата. Годинешната награда и е доделена на книгата „Лесно ми е да бидам полоша“ од младата поетеса Антонија Новаковиќ.
„Со преставниците на Министерството за култура зборувавме за начините за зајакнување на соработката во областа на културата и културното наследство меѓу УНЕСКО и вашата земја. Освен заштитениот Охрид, имаме добиено уште два предлога за ставање на листата на заштита, а јас ветив дека експертите на УНЕСКО и на БРЕСЦЕ ќе им помогнат на вашите луѓе за тоа и да се реализира“ -изјави Мацура и посочи дека очекува од земјава да се поднесат и предлози за заштита на нематеријалното културно наследство, за одредени ремек дела, што земјава со оглед на зачуваното богатство и ги поседува.
Отворениот Регионалниот центар за дигитализација на културното наследство ќе работи на поврзување на национално, а потоа и на регионално ниво на сите институции од доменот на заштитата на културно наследство. | 
