Судот ослободи двајца лекари за случајот „Кметовска“

Само Борче Антевски е осуден на условна казна од три години и на надоместок на штета од еден милион денари

Љубиша Станковиќ


Судскиот совет со кој раководеше судијката Добрила Кацарска вчера донесе решение со кое лекарите Митко Караѓозов и Александар Јосифов се ослободуваат од виновност за несовесно лекување на младата Наташа Кметовска (19), која пред пет години почина на Клиниката за торакална и васкуларна хирургија како последица од ранување од огнено оружје.

Третообвинетиот, Борче Антевски, судот го огласи за виновен и му изрече казна затвор во траење од една година, а која му се заменува за условна казна во траење од три години. Судот го задолжи на име нематеријална штета на семејството на починатата да му плати отштета од еден милион денари.

Од повторената пресуда што ја изрече скопскиот Кривичен суд незадоволен е докторот Антевски, но и семејството на Наташа Кметовска.

Пресудата што вчера беше изречена доаѓа по одлуките што во изминативе неколку години беа изрекувани како во „единицата“, така и во Апелацискиот суд во Скопје. За трагичниот настан што се случи на 3 јануари 2005 година и за кој беа обвинети тројцата лекари што се грижеле за повредената девојка на 27 февруари 2006 година, судот донесе пресуда со која тројцата обвинети беа огласени за виновни. Советот, кој тогаш постапуваше во тој предмет, донесе одлука со која обвинетите Караѓозов, Јосифов и Антевски беа казнети со по една година затвор што им се заменува за условна казна во траење од три години.

Одлуката на судот, која тогашниот застапник на семејството Кметовски ја окарактеризира како „класичен абортус на македонското судство“, беше обжалена и предметот беше испратен во повисокиот суд.

По одржаната јавна седница, некаде кон крајот на септември 2006 година, на која првостепената пресуда напишана на 71 страница беше нападната по сите основи, судот ги прифати жалбите на обвинетите и на нивните бранители и одлучи предметот да го врати на повторно одлучување.

Повторениот судски процес беше закажан за крајот на мај минатата година, а финализираше со вчерашната одлука на судот.

Наташа Кметовска почина од последици по ранувањето од заскитан куршум при дочекот на 2005 година на централниот скопски плоштад.