Нема замена за Бранко во СДСМ, барем засега

За идниот сдсмовски премиер ќе се разговара пред смената на власта

Александра М. Митевска


Лидерот на СДСМ, Бранко Црвенковски, можеби нема повторно да биде премиер, ако неговата политичка опција победи на следните парламентарни избори, но се' уште е рано да се каже кој, во таков случај, би ја предводел новата левичарска влада. За можниот наследник (од сдсмовските редови) на Никола Груевски на „Илинденска“ би можело да се разговара дури тогаш кога ќе стане извесна смената на власта, односно непосредно пред избори и кога промените во рејтинзите на водечките партии ќе станат позабележливи. Ова го тврдат високи партиски извори, откако поранешниот шеф на државата уште еднаш стави на знаење дека премиерската функција веќе не е толку голем предизвик за него. Во емисијата ХО, на Канал 5, Црвенковски рече дека тој не мора да биде премиер, но оти мора да биде тука за да се порази Груевски. Црвенковски уште еднаш повтори и дека ќе се повлече од политиката ако СДСМ ги изгуби следните избори. Но, прашање е што би претставувало пораз за СДСМ, односно дали за пораз би се сметала ситуација во која ВМРО-ДПМНЕ би освоила најмногу пратенички места, но не доволно за да формира влада?

Зоран Јовановски, Радмила Шекеринска, Стевчо Јакимовски... се лицата околу кои најчесто се плетат шпекулации за можен наследник на Црвенковски. Јовановски се спомнува како ново лице во политиката и како истакнат економист, а Шекеринска, поради дебелото политичко портфолио и наводното затоплување на релациите со Црвенковски, иако таа во една пригода изјави дека не е дел од дворските игри во СДСМ за нов премиер. Јакимовски, пак, се посочува како експониран политичар со своја база, иако неодамна тој во изјава за „Утрински весник“ тврдеше дека нема амбиции за премиерската фотелја.

Но, според наши информации, на ниедна од спомнатите личности досега не и' била понудена кандидатура за премиер ниту, пак, такво нешто се планира во догледно време, особено откако ВМРО-ДПМНЕ ја отфрли опозициската иницијатива за предвремени избори во почетокот на следната година, а Груевски најави дека планира двобој со Црвенковски во редовниот термин, односно најрано за 15 месеци. „Да го прашате Љупчо Георгиевски кога одлучил да го протежира Груевски за свој наследник, сигурно би кажал дека тоа било еден-два месеца пред охридскиот Конгрес, кога тој си поднесе оставка од лидер на ВМРО-ДПМНЕ“, коментира функционер на СДСМ. Според него, сосема нормално е такви одлуки да се носат во последен момент, бидејќи во политиката околностите се менуваат со голема брзина, а со избрзани решенија само му се отвора простор на противникот да ги дискредитира кадровските потенцијали на спротивниот табор. Тоа, истовремено, е и едно од образложенијата зошто СДСМ се' уште не ја промовирал најавената влада во сенка, покрај тоа што се' уште не се знае кој би бил нејзин премиер.

Сепак, ако се суди според досегашните изјави на Црвенковски, тој се' уште не ја отфрла децидно можноста повторно да биде премиер. Деновиве, на пример, во соопштение од СДСМ (контра говорот на Груевски пред Унијата на жени на ВМРО-ДПМНЕ) се наведува „Црвенковски повторно ќе го предводи народот, а ВМРО-ДПМНЕ ќе треба да се соочи со гневот на сопствените граѓани“...

Ако СДСМ победи на наредните избори, а Црвенковски навистина реши да не се враќа на „Илинденска“, тогаш би се н��метнале и други прашања: Дали тој воопшто ќе биде носител на изборна листа на СДСМ? Дали ќе остане пратеник во Собранието? И најважното, дали ќе му ја препушти на новиот премиер и лидерската позиција, бидејќи социјалдемократите веќе имаат едно лошо искуство со премиер што не беше член на партиското раководств��? (A.M.M.)