Фијаско на реформата за администрацијата

Парламентарното мнозинство не успеа да обезбеди 80 гласа за системскиот закон што ја регулира организацијата на државната управа

Катица Чангова


Реформата на администрацијата доживеа фијаско во Собранието. На вчерашната седница владејачката коалиција на ВМРО-ДПМНЕ и ДУИ не успеа да ги обезбеди потребните 80 гласа за системскиот закон што ја регулира организацијата на државната управа. Иако во дебатната сала се појавија и Али Ахмети и Фијат Цаноски, или вкупно 79 гласачи, сепак, тоа не беше доволно за визирање на измените што отвораат пат за создавање мамутско Министерство за информатичко општество и администрација.

Предлогот предвидуваше ресорот што сега го води Иво Ивановски да има ингеренции и во телекомуникациите и во радиодифузијата. Законот не мина и при поединечното гласање што го побара пратеник на ВМРО-ДПМНЕ.

Новините што се пресериозни, а преку ноќ, по скратена постапка беа сервирани во парламентот, добија многубројни критики од експерти, од опозицијата, но и од Брисел.

Огромното задоволство од тоа што законот не го доби потребното двотретинско мнозинство опозицијата, облечена во жолти маички, го манифестираше бурно, бучно и еуфорично, со аплаузи во собраниската сала.

Поради ваквиот (не)очекуван тек на настаните, спикерот Трајко Вељаноски мораше да се снајде, а тоа го направи прескокнувајќи ја, исто така, важната точка поврзана со претходниот проект, измените на Законот за државни службеници за чие визирање се потребни 61 пратенички глас.

Како што дознава „Утрински весник“, ваквиот пораз во обезбедувањето мнозинство во Собранието воопшто не ја обесхрабри власта за да преземе неочекуван чекор. Вчера доцна попладне во архивата на законодавниот дом е заверен истиот предлог системски закон, но разликата е во тоа што како предлагачи се потпишани пратеници на ВМРО-ДПМНЕ и на ДУИ, а не Владата и Министерството за правда. Можно е, дознаваме, новото гласање за измените на Законот за државна управа да се најде на собраниската седница што се планира за овој четврток.

„Измените на двата закона, за државна управа и за државни службеници, нудат катастрофални решенија, бидејќи обезбедуваат правен механизам за натамошна политизација и партизација на администрацијата. Со првиот закон се прави упад во структурата и во организацијата на управата и се опструира процесот на реформа на јавната администрација. Со вториот закон, меѓу другото, се прави терен за партиски вработување и за отпуштање на неподобните државни службеници“, коментира Ана Павловска-Данева, професорка на Правниот факултет. Додава дека од 2008 година наваму не се случило власта да нема мнозинство за системски закон.

Тоа, според Павловска-Данева, е сериозен пораз за власта. „Целосно се дискредитира министерот за правда, Михајло Маневски, кој го подготви законот, но и подносителот Никола Груевски како претседател на Владата. По се' изгледа, ќе мора да преговараат со коалициските партнери“, заклучи професорката на Правниот факултет. Таа смета дека владејачката гарнитура сама си ги врза рацете, дека се заплетка во брзањето, а залудно беше инсистирањето за скратена постапка. Според неа, треба да поминат неколку месеци пред законот одново да влезе во процедура. Од собраниските служби, пак, велат дека не постоеле ниту деловнички ниту уставни пречки за ставање на предложениот закон повторно на седница.

И невладиниот сектор вчера со критики за инсистирањето на владејачкото мнозинство набрзина да се донесат два закона во скратена постапка. Во најмала рака тоа е скандалозно и крајно несериозно ако се има предвид дека станува збор за севкупната реформа во администрацијата, сметаат од Институтот отвор��но општество. Оттаму нагласуваат дека законите не се логично поврзани со процесот на изготвување на предлог-стратегијата за реформата на јавната администрација што, исто така, се одвива паралелно на овој процес. Затоа предлагаат стратегијата да се разгледа и да се усвои од Собранието, а двата предложени закона да се повлечат од собраниска постапка и да се вратат на доработка. Процесот на реформа на администрацијата да не му се доверува на Министерството за информатичко општество, со оглед на слабите капацитети и несоодветната организациска поставеност во однос на другите министерства. Од Фондацијата отворено општество предлагаат да се разгледа можноста реформата да ја води Агенцијата за државни службеници како независно тело, а јакнењето на нејзините надлежности да биде приоритет.