Жешки дебати во Владата за поскапувањето на градинките

Министерот Бајрами останува на ставот дека покачувањето е неопходно, а други владини извори тврдат дека нема основа за тоа

Жаклина Ѓорѓевиќ


Можното покачување на цената во градинките ги подели владините функционери. И додека министерот за труд и социјална политика, Џељал Бајрами, вчера за „Утрински весник“ потврди дека останува на ставот дека покачувањето на цените е неопходно, други владини извори тврдат дека нема никаква основа за поскапување на градинките во услови на економска криза. На оваа тема веќе имало прилично жешки дебати во Владата.

Родителите се изненадени од најавите за покачување на цената во државните градинки, која уште не е официјално соопштена, иако се најавува дека тоа ќе се случи наскоро. На вратите во некои градинки веќе е истакнато дека цената за престој на децата од овој месец, најверојатно, ќе се покачи од 1.490 на 2.000 денари, но оваа информација ја негираат во Министерството за труд и социјална политика, со изговор дека се' уште се размислува за цената. Оттаму најавуваат контроли со цел да се провери кои градинки на своја рака ги истакнале ваквите соопштенија.

Родителите, пак, веќе реагираат на поскапувањето. Новата цена во државните градинки е висока, коментираат родителите, бидејќи, според нивните процени, се доближува до онаа во приватните. Тоа посебно ќе се одрази врз буџетот на оние родители што носат две деца во државна градинка, бидејќи немаат друг избор.

Неофицијално дознаваме дека имало веќе една средба на десетина директори на скопски градинки што застанале зад идејата за зголемување на цената за престој во градинките. Но, откако средбата не поминала успешно, во план им е да одржат нова средба. „Но, согласно со законите, само Министерството може да одлучи за цената во градинките“, коментираат високи извори од ресорното Министерство. Пред неколку месеци ваквиот притисок за зголемување на цената во форма на информација бил доставен и во Владата, но за идејата воопшто не се дискутирало. Ставот на Владата, наводно, бил дека во услови на криза воопшто не може да се удри по џебот на родителите. „Моментално нема основа за покачување на цените“, тврдат анонимни извори во Владата.

Инаку, и сега има големи трошоци за престојот на децата во градинките.

Англиски и курсеви по танц, „росици“, блокови, боички, стои на километражниот список што им се дава на родителите во градинките. А кога на тоа ќе се додадат и влажни марамчиња, тоалетна хартија и сапун, цената, секако, не запира на стандардните 1.500 денари колку што се бара за престој во градинките.

„Со новата цена од 2.000 денари многу ќе ни биде скапо затоа што покрај редовната месечна претплата, плаќаме и други издатоци. Плаќаме за ’Росица’, потоа за часови по англиски 400 денари месечно и за часови по ритам и танци уште 350 денари. Што значи, тие 2.000 денари веќе ги даваме, а сега ќе треба да издвојуваме и повеќе“, вели мајка на тригодишно дете. Во градинката бараат од неа два пати годишно да купи материјали неопходни за детето. „Не знам, ама можеби е подобро ќерка ми да ја запишам во приватна градинка. Барем таму нема ништо да ми бараат да купувам“, се жали мајката.

Во дел од градинките има соопштение со кое се најавува новата цена, но тоа се демантира. Родителите биле фрапирани кога пред извесно време дошле во градинка за да ја земат уплатницата, а ги пречекало известување за но��а цена веќе од наредниот месец. Сепак, во градинките вчера имаше дециден став дека уште не се известени за новото покачување.

„Засега се' уште не е дефинирано колку ќе биде покачувањето за престој на децата во градинките, но, факт е дека ќе има покачување, бидејќи тоа го налагаат условите зашто повеќе од 7-8 години не е извршено коригирање на цените, иако реално имало потреба од тоа“, ни изјави вчера министерот за труд и социјала, Џељал Бајрами. Тој смета дека родителите ќе можат да го издржат покачувањето. За возврат, вели Бајрами, родителите ќе добијат подобри услови за престој на нивните деца во градинките.

Злата Николиќ, директорка на државната градинка „Раде Јовчески-Корчагин“, ја поздравува одлуката за покачување на цената. Парите што ги добиваат за престој на децата, според неа, во најголем дел ги користат за храна, со што едвај ги покриваат трошоците. Затоа имаат огромна помош и субвенции од државата.

„Ние сме задоволни што општината Центар и државата ни излегуваат во пресрет кога треба да се интервенира и не не' забораваат“, се пофали директорката. Според неа, платите на воспитувачките и на негователките до пред 2-3 години биле замрзнати, а во последниве години се покачени. (Ж.Ѓ.)