Две понуди за шест бродоградилишта

Загреб - Хрватска доби само две валидни понуди на меѓународниот тендер за шест бродоградилишта во земјата, соопшти хрватскиот фонд за приватизација. Понуди дадоа „Бродотрогир“ од Трогир и „Бродсплит“ од Сплит, а се' уште не е познато дали тие ќе бидат прифатени. „Проблемите во хрватскиот сектор на бродоградба се многу поголеми од она што беше посочено кон крајот на 2008 година“, изјави вицепремиерот и министер за економија на Хрватска, Дамир Поланчец. Според него, приватизацијата на хрватската бродоградба треба да заврши што е можно поскоро.

Хрватска, која се бори за членство во ЕУ, беше советувана од Брисел да ја продаде индустријата за бродоградба, која добива огромни субвенции. Шесте бродоградилишта, од кои три се во северното крајбрежје на Хрватска, а три во јужното, обезбедуваат работа за 12 илјади лица, а други десетици илјади се директно или индиректно зависни од оваа индустриска гранка. (МИА)