Индустријата со пораст, ама отпуштањата не престануваат

Отпуштањата во индустријата продолжиле и во јуни годинава, и покрај тоа што обемот на индустриско производство во истиот месец покажа раст, и тоа за 5,4 проценти. Но, и покрај ваквиот охрабрувачки сигнал во индустријата, во тие компании не престанува намалувањето на бројот на работниците, кое трае во континуитет, а во јуни изнесуваше 5,3 отсто.

Домашните статистичари пресметале дека бројот на работници во секторот вадење руди и камен е намален за 2,3 отсто, во преработувачката индустрија падот е за 5,9 проценти и во секторот снабдување со електрична енергија, гас и вода намалувањето изнесува 0,5 отсто.

Според експертите, фактот дека продолжуваат отпуштањата во индустриските компании и во јуни и покрај фактот што во тој месец индустријата, конечно, забележа благ пораст, доволно говори дека нема премногу простор за олабавување, односно оти состојбата е далеку од некое посериозно економско закрепнување.

Дека и оваа 2010 година е лоша за работниците, а особено нејзиното прво полугодие, доказ е и податокот што бројот на работниците во индустријата во првите шест месеци, односно во периодот јануари-јуни 2010 година, во однос на истиот период лани, бележи намалување од 6,8 отсто. (Ек.Р.)