Поглед

Заслуги, заслуги...

Нина Нинеска-Фиданоска

Можеби ако денес нагло огрее сонце, ако некако успее да се избори со овие здодевни и влажни облаци што деновиве добро се потрудија да ни го расипат расположението, и за тоа ќе бидат заслужни премиерот Никола Груевски и тимот министри кои неуморно се грижат за доброто на народот! Затоа што оваа власт едноставно мора да си ги припише сите фини работи што ни се случиле или што ќе следуваат во иднина. А за лошите, е за тоа постојано има некои други дежурни виновници, олицетворени или во злобните соседи, или во светската економска криза или, пак, во оние неразбрани новинари, кои не мислат на ништо друго освен да го оцрнат владиниот кабинет.

Така, деновиве дознавме дека фактот што од идната година во земјава ќе влегуваат без царина автомобили и други производи од Европската унија, бил благодарение исклучиво на актуелниве власти. Така барем вицепремиерот и министер за финансии Зоран Ставрески „мртов“ сериозен ја извести македонската јавност. Тој сосема комотно соопшти оти Владата била охрабрена од успехот на мерката за увоз на евтини стари коли, па решила и во 2011 година да продолжи со намалување на царината, односно да воведе нула стапка царина за увозот на возила од ЕУ! Каква дрскост и потценување на јавноста. Па, од нас има и не��ои со сеќавање малку подолго од ерата на преродбата, кои паметат дека царините се снижуваат постепено секоја година како резултат на Спогодбата за стабилизација и асоцијација со ЕУ потпишана во 2001 година. А и Груевски и Ставрески тоа добро го знаат, бидејќи во тоа време едниот беше министер за финансии, а другиот негова десна рака. Зошто тогаш беа потребни вакви несреќни обиди да се припишат ситни поени, кога вистината секогаш излегува на виделина?