Бабунски шокиран од двата пораза
Моите играчи мораат да ги ценат ривалите, а не да мислат дека се најдобри во лигата, вели тренерот на Работнички
Миодраг Мицковиќ
По двата неочекувани пораза, против Вардар и последниот против Ренова, нему му е сигурно најтешко. Тим менаџерот на Работнички Бобан Бабунски е се уште под шок од овие неуспеси кои го одалечија неговиот тим од одбрана на титулата. Наместо бодовната разлика со лидерот на табелата Македонија да се намали на само 6 бода, како што сите беа уверени во Работнички пред пролетниот старт, таа уште повеќе се зголеми на речиси недостижни 12 бода на 11 кола пред крајот на годинашново првенство.
Разочаран, депримиран, речиси и немаше зборови да ги објасни двата пораза против Вардар и Ренова првиот човек на Стручниот штаб на Работнички Бобан Бабунски. Одвај најде зборови обидувајќи се изнајде причини за еден ваков дебакл на неговиот тим, за кој сите сметаат дека има најдобар играчки состав во лигата.
-Што да кажам, се уште не сум свесен, ниту јас ниту моите играчи што не снајде во овие две кола, беа првите зборови на Бабунски. Зарем е можно да ги загубиме двата меча на кои очекувавме сигурни победи, но гледате и тоа се случи. Моите играчи мораат да имаат поголем респект кон своите противници, да не мислат дека се тие најдобри во лигата, дека е доволно само да излезат на теренот и да победат. Морам и да кажам дека играат под еден голем психолошки товар дека мора да победат, таа улога на големи фаворити во битка за титулата скапо не чинеше. Особено таа самоувереност кај играчите. Меѓутоа, јас имам доверба во овој тим, во нивниот квалитет. Убеден сум дека ќе играме многу подобро можеби ја загубивме шансата да ја одбраниме титулаа но тука е купот за да се појавиме во Европа. Но, сигурно со еден поинаков пристап кон играта и односот на теренот.
Дали ќе има парични казни за еден ваков дебакл, размислувавте ли за тоа?
-Јас не сум приврзаник на парични казни, тоа е најлесна работа да се казнат фудбалерите кога ќе загубат. Па тие самите себе си се казнија. За овие два меча имаа добри премии, имаа и посебни парични награди од спонзорите доколку победат. И видовте, ништо од тоа. Секој првотимец остана покус за околу 2.500 евра, не е тоа мала сума. Овој месец играат само за плата. Па сега нека размислуваат како ќе играат на наредните мечеви.
-Морам да кажам, продолжи Бабунски дека малку ни се поремети концепцијата во играта и подготовките бидејќи Масев, Божиновски, Пандев и Вандаир ни се приклучија подоцна, ќе треба време да се уиграат во овој состав. Го нема и голгетерот Кировски кој си замина во странство и сега треба да бараме нови решенија. Овој тим на Работнички има десетина нови играчи, не е тоа малку, ќе треба време сето тоа да се укомпонира и уигра.
-Знам дека сме погодени и разочарани по овие неочекувани порази но мислам дека се сепак добредојдени, играчите малку да се спушат на земја, да не летаат во облаци, да играат без потценување кон своите противници, премногу се занесоа дека се дрим-тим во Првата лига. А за тоа треба игра, треба и да се победува. |
