Претходен број

Грчката амбасадорка сред Скопје бараше забрана за уставното име

Александра Пападопулу ја прекинуваше средбата на министрите за култура на ЈИЕ поради името на Македонија

Сунчица Уневска

На вчерашната конференција на министрите за култура на 12 земји од Југоисточна Европа, кои на иницијатива на Македонија дојдоа во Скопје за да се обединат на културен план во областа на аудиовизуелната комуникација покренувајќи еден заеднички културен магазин, амбасадорката на Грција во Македонија Александра Попадопулу ја прекина средбата со инсистирање да и биде дозволено да го вложи својот протест за употребата на уставното име на нашата земја. Амбасадорката Пападопулу беше толку упорна да го изрази својот став што двапати ја прекинуваше конференцијата барајќи збор. Интересно е дека во срцето на Македонија на конференција на која ние сме домаќини грчката амбасадорка прво си зема за право да го менува редот на обраќањето, бидејќи со неа било договорено да и' се даде збор по обраќањето на министрите, а потоа изразува протест поради тоа што ние на конференцијата го употребуваме своето уставно име, со што сме го направиле невозможно учеството на Грција на оваа средба.

Амбасадорката Пападопулу рече дека доаѓа со големо жалење на оваа конференција, на која инаку беше поканет и грчкиот министер за култура, кој не ни одговори, бидејќи организаторите во сите официјални материјали ги ставиле уставните имиња на земјите-учеснички, а не имињата на самите учесници. Таа рече дека тоа било пракса која Грција ја прифатила за да ја поттикне интеграцијата на Македонија во ЕУ. Освен тоа Пападопулу тврдеше дека уште пред оваа конференција така се договорила со организаторите кои прифатиле да не ги употребуваат уставните имиња.

„Заедно со Министерството за култура ова е злонамерно кршење на времената спогодба која е потпишана во 1995 година и на договорот кој е усогласен со ЕУ, поради што ова прекршување е многу подлабоко. Грција има искрена желба и државна цел да се реши прашањето со името. Оваа иницијатива која промовира соработка е всушност претворена во политички настан и затоа го вложувам овој протест“, изјави амбасадорката, која дојде подготвена со напишана изјава и веднаш си замина.

Јордан Плевнеш, ректор на Универзитетот за аудиовизуелни уметности, кој е и организатор на оваа конференција, појасни дека немало никаков договор претходно, бидејќи немало ни потврдено учество на грчкиот министер за култура и барање од негова страна за ваква отстапка. Тој рече дека ова е настан кој се издигнува над политичката реалност и кој не би требало да се меша со политиката, но дека за жал ваквото реагирање не враќа токму на политиката.

Плевнеш ја цитираше мислата на Жан Моне искажана уште во 1952 година дека Европа нема никогаш да се создаде ако се употребува вето како национален егоизам. „А овде го видовме токму тоа, израз на национален егоизам“, потенцира Плевнеш, на што доби аплауз од сите присутни, меѓу кои имаше огромен број гости.

Интересно е дека веднаш потоа беше предвидено обраќањето на високите гости од Регионалното биро на УНЕСКО, Енгелберт Роуз, директорот на Бирото и Владимир Шуха, директор на Генералниот директорат за образование и култура на Европската комисија, кои и даваат голема поддршка на Македонија и на оваа идеја, но никој не и обрна внимание на реакцијата, туку продолжија со своето излагање околу важноста на ова соединување на земјите од Југоисточна Европа. А станува збор за прво поврзување на 12 земји од Југоисточна Европа на ваков начин. Идејата е Македонија, Србија, Црна Гора, Босна и Херцеговина, Словенија, Хрватска, Косово, Романија, Бугарија, Албанија, Турција и Грција да покренат еден културен магазин насловен „Југо-Источна Европа на дланка“, кој ќе се емитува на 12 телевизии со национална концесија. Неговата концепција е тој да биде во траење од 60 минути со тоа што во секое издание секоја од земјите ќе има свое културно претставување од пет минути со се' што е ново на ова поле. Ваквата емисија би се емитувала на сите телевизии еднаш месечно. Со оглед на тоа што ова беше иницијативната средба, првото издание на овој магазин се очекува на почетокот на следната 2010 година.

„Оваа иницијатива ги унапредува прашањата потребни земјите на Југоисточна Европа да продолжат со обновување на дијалогот, почитувањето и признавањето на културната разновидност“, рече Енгелберт Роуз потенцирајќи дека клучна улога во надминувањето на стереотипите, всушност, имаат масовните медиуми. На тоа господинот Шуха додаде дека културната разновидност е важна за економскиот растечки концепт во Америка, но се' повеќе и во Европа. Тој нагласи дека новите креативни индустрии не се доволни, дека е потребна креативна отвореност како еден вид антидоза против ксенофобијата и национализмот.

Министерката за култура Елизабета Канческа-Милевска истакна дека оваа конференција има цел да потврди дека културата и аудиовизуелната комуникација се вектори на мирот и на европската иднина на земјите на Југоисточна Европа и дека само со меѓусебна отвореност и дијалог можеме да постигнеме успех и просперитет.

На оваа средба на која главна тема е токму аудиовизуелната комуникација и медиуми и новите креативни индустрии, покрај министрите поканети се и гости од областа на театарот, публицистиката и новинарството од земјите на Југоисточна Европа, но и од Франција, која како дел од ЕСРА Париз-Скопје-Њујорк, исто така, е иницијатор и дел од овој проект.