| Усвоен планот за изградба на хотели под Кале
Без никаква дискусија и забелешки мнозинството во Советот на Општина Центар го усвои Урбанистичкиот план кој предвидува изградба на пет хотели, катна гаража и спортски комплекс под Кале. Истовремено, зелено светло се даде и за новата верзија на ДУП-от кој овозможува надградба на Домот на АРМ за два ката и на трговскиот центар „Плаза“ за еден кат.
Овој план предвидува и подземно паркирање на две нивоа под сегашниот паркинг кај Министерството за транспорт и врски, како и подземно паркирање на два ката кај новата зграда на Уставен суд што треба да се гради пред Комерцијална банка, на левиот брег на Вардар. Подземните паркинзи под паркот „Жена борец“, до парламентот и покрај „Палома Бјанка“, кои во првичната верзија на планот беа планирани да бидат на две нивоа, сега се предвидува да бидат на три ката под земја.
Точките за урбанистичките планови се усвоија за неочекувано кусо време, иако претходно имаше обид да се симнат од дневниот ред. Советникот Иванчо Вучевски од НСДП, со образложение дека сме на прагот на почетокот на изборната кампања, предложи точките воопшто да не се разгледуваат, но предлогот го поддржаа само четворица негови колеги. (Дс.Т.) |
