Биометриските пасоши ги заглавија туристите

Неизвесноста околу земањето на пасошот навреме е проблем за граѓаните и за туристичките агенции

Миркица Поповиќ

Ќе ви биде ли готов новиот биометриски пасош пред заминување на летен одмор? Оваа тема, иако го засега целото семејство или друштвото со кое планирате летен одмор, од друга страна, ги засега и туристичките агенции. Олеснувањето на визниот режим, кој беше голема воздишка за сите оние што досега имаа тешкотии со вадење виза, се' уште не е реалност за сите македонски граѓани. Па така, се чини дека долгите процедури за издавање биометриски пасош и чекањето да се подигне ги заменија долгите чекања пред амбасадите.

Од туристичките агенции велат дека веќе се појавија првите случаи на граѓани, кои поради проблеми со биометрискиот пасош, принудени се да ги откажат резервираните пакет-аранжмани за мајските патувања. Александар Чоневски од туристичката агенција „Игуана“ вели дека досега имале неколку вакви случаи и смета дека ова може да биде реална причина за загриженост на туристичките агенции, особено во екот на сезоната. Иако туристичките агенции им советуваат на граѓаните да ги средат работите со патните документи пред да уплатат целосно за аранжманот, за жал, има случаи каде што поради оптимизмот на граѓаните дека ќе имаат в раце биометриски пасош пред тргнувањето на одмор, доаѓа до конфликт со агенцијата.

Како што раскажува Чоневски, граѓаните изреволтирани од долгото чекање на пасошот што во одредениот случај им ги урива плановите за одмор, започнуваат кавги со агенцијата, барајќи да им помогнат преку јавување во МВР за да се забрза процедурата за издавање на нивниот пасош. Најголемиот проблем, секако, е откажувањето на резервацијата и барање целосно да им се врати уплатениот износ.

Тука се појавува проблем за повеќе страни. Пред се', со договорот што го потпишуваат со туристичката агенција, странките се согласуваат на условите со кои е предвидено дека за отказ на резервацијата 30 дена пред патувањето се наплатува 5 отсто од сумата, 21-15 дена пред тргнувањето 20 отсто, 14-8 дена 50 отсто и за отказ 7 до 1 ден пред патувањето се наплаќа 90 отсто од вкупната уплатена сума за аранжманот. Менување на терминот е малку побезболна опција и доколку се направи 15 дена пред тргнувањето и, секако, доколку организаторот е во можност да ја изврши промената на резервацијата. Во овој случај се наплаќаат само манипулативни трошоци во износ од 10 евра.

Во вакви случаи туристичката агенција се соочува и со проблем од друга страна, односно партнерите од хотелите и апартманите со кои соработуваат. Чоневски истакнува дека партнерите воопшто не ги засегаат причините поради кои се откажуваат резервациите и очекуваат да бидат донесени договорениот број гости или, пак, да им биде платено за откажаните резервации. Ова ги растргнува туристичките агенции меѓу клиентите, кои не ги добиваат пасошите и по 2 месеца чекање, па потоа бараат враќање на парите, и меѓу партнерите од хотелите и апартманите, кои бараат да им се плати за направените резервации.

Се чини дека грешките при организација за издавање пасоши во МВР може да ги чини граѓаните еден цел годишен одмор.