Кипарска Омонија се одомаќини во Македонија

Тимот од Никозија доаѓа третпат, сега против Ренова во ЛШ, Работнички ќе игра со Луситанс, Тетекс со Вентспилс, Металург со Карабах

Сашко Ѓ. Димовски

Вицешампионот Работнички со најмногу среќа, шампионот Ренова со најмалку, при вчерашната ждрепка во Нион за квалификациските рунди во европските фудбалски купови за сезоната 2010/11. Во дебитантското учество во ЛШ тетовци налетаа на силната Омонија од Кипар во второто коло. Првиот меч ќе го одиграат во гости на 29/30 јуни, како и останатите три наши претставници во меѓународните натпреварувања ова лето, реваншот е закажан за 06/07 јули. Кипраните, летово, по трет пат ќе ја посетат Македонија во последните шест години. Во претходните два наврата си заминаа со подигнати глави. Во сезоната 2004/05, во првото квалификациско коло за Куп УЕФА, ја декласираа Слога Југомагнат со вкупен резултат 8:1 (во Скопје славеа со 4:0, во реваншот со 4:1), во сезоната 2008/09, во истото натпреварување, беа подобри од Милано со вкупни 4:1 (дома победија со 2:0, на „Милано арена“ во Куманово со 2:1).

Затоа, пак, далеку повеќе причина за задоволство и опти��изам може да се најде во таборот на „романтичарите“. Нивна прва дестинација во годинашните настапи во Лига Европа ќе биде Андора и тамошниот аматерски состав на Луситанс. Работнички ќе гостува на Пиринеите на 1 јули, возвратниот меч е седум дена подоцна во Скопје. Во случај да го мине Андорците, што е без сомнение за очекување, македонскиот вицепрвак ќе обезбеди двомеч со ерменска МИКА во наредното коло. Во таа ситуација првиот натпревар ќе се одигра на националната арена „Филип Втори“ на 15 јули, седум дена подоцна на стадионот во Ереван.

Екипата на Тетекс во дебито во европските купови ќе се сретне со Вентсплис. Тетовци беа привилегирани при вчерашната ждрепка и своето учество во Лига Европа, како освојувачи на македонскиот национален куп, ќе го почнат од второто коло и во првиот меч (15 јули) ќе гостуваат во Летонија.

Последниот наш претставник, Металург, во првото квалификациско коло за Лига Европа го доби тимот на Карабах од Азербејџан. И за составот од Автокоманда ова ќе биде премиерно учество во европските купови. Воведните 90 минути ќе ги одигра во гости (15 јули), реваншот е закажан за 22 јули во Скопје. Подобриот од двомечот меѓу Карабах и Металург, во второто коло ќе се пресмета со подобриот од пресметката меѓу Портдаун од Северна Ирска и Сконто од Летонија.