Хоџсон брилира, Ливерпул не е во криза!

Ливерпул продолжува да игра очајно. Се сменија и сопствениците, но барем во првиот меч под водство на „Њу Ингланд спортс венчр“ ништо не се смени. Газдата Цон Хенри дојде специјално да си го види тимот во градското дерби со Евертон и на стартот се шокираше - пораз од 0:2.

А, само неколку часа пред дербито тренерот Рој Хоџсон го кажа ова: „Би бил тажен ден и за мене и за Ливерпул доколку челниците ми се заблагодарат на се' по само осум меча и тргнат во потрага по нов човек. Такви работи се случуваат. Невозможно е да соберете толку години во фудбалот, колку што имам јас, а да не добиете отказ. Но сега тоа тука е непопуларен потег. Тоа не е стилот на Ливерпул. А, и не ме доведоа без мака, дури два месеци носеа одлука, а потоа и платија отштета на Фулам“, додаде Хоџсон за по поразот од Евертон да продолжи да брилјира: „Мислам дека не станува збор за криза, мислам дека нашата игра потврди дека не спаѓаме во трите најслаби клуба. Од друга страна имаме шест бода од осум меча и тоа е многу слаб почеток. Мора да почнеме да победуваме за да се мрднеме напред на табелата. Во првиот дел со Евертон немавме баш среќа. А, во вториот игравме добро, создававме шанси, ги ограничивме на неколку обиди и ги стиснавме на нивна половина“, вели Хоџсон.