Илија Димовски: Претеравме со еден-два споменика

Втор ден остра собраниска расправа за „Скопје 2014“

Горан Адамовски

„Можеби претеравме со еден-два споменика“, призна на собраниската говорница Илија Димовски, директор на Центарот за комуникации на ВМРО-ДПМНЕ. Одговорајќи на нападите на опозицијата, Димовски уште еднаш повтори дека спомениците се најмал дел од проектот „Скопје 2014“, оти се градат домови за државните институции, се делат земјоделски субвенции, а власта паралелно ги зголемува платите и пензиите на граѓаните.

Димовски, всушност, му реплицираше на Ивон Величковски од ЛДП, кој зборуваше против „Скопје 2014’“ од сите аспекти: од тоа дека антиквизицијата значи менување на историјата, преку расипничкото трошење во услови на сиромаштија, а стигна и до цената на бензините.

„Цената на бензините не зависи од нас, а плус тоа се најниски во Европа. Колега Величковски, кога ќе одите во Грција на одмор, уште тука ќе го наполните резервоарот“, врати Миле Пачемски.

Пратениците од власта, всушност, постојано водеа реплики со Величковски. Малиша Станковиќ праша зошто опозициските градоначалници го копираат проектот, градејќи плоштади и споменици во своите општини, а Светлана Јакимовска потсети дека нови згради ќе добијат: Уставниот суд, Јавното обвинителство, Државниот архив, Филхармонијата, Народниот театар...

„Колешке Јакимовска, Вие сте од Кисела Вода. Зошто не го поправивте покривот на ОУ ‘Невена Георгиева - Дуња‘? Да не градевте куполи за Собранието, ќе имаше пари и за други работи. Ама сакате простор, канцеларии, луксуз, па скративте од граѓаните“’, возврати Величковски, на што „спикерот“ Трајко Вељаноски констатираше оти првпат слуша некој во Собранието да се пожали за градежните зафати во законодавниот дом.

Расправата доби историски тек. Избраниците на ВМРО-ДПМНЕ повторуваа оти на овие простори живееле луѓе и пред Словените, оти името Македонија е античко и оти во проектот „Скопје 2014’ се опфатени исти историски нишки на Македонија, со цел надградба на македонската историја и свест.

„Ако викате дека античките Македонци биле Грци, зошто тогаш Судот во Хаг донесе пресуда дека Македонија не го краде туѓиот, односно грчкиот идентитет“, праша Силвана Бонева на што Величковски и' се обрати со зборовите: „Античка струмичка војвотка“.

„Го напаѓате проектот затоа што ќе го одбележи владеењето на ВМРО-ДПМНЕ, а не затоа што не ви се допаѓа“, поентираше Јордан Пачков, на што опозиционерите контрираа дека конечно дознале зошто се прави проектот: за да се одбележело владеењето на Груевски.

Кој е патриот, а кој е предавник беше неизбежен фолклор и на вчерашната расправа. Пратениците од двете партии си дофрлаа од место, навредувајќи се на национална основа. Си префрлаа кој повеќе крадел и во чие време, кој се борел за името, а кој за идентитетот.

„Зошто не ставивте знамиња во училиштата? Така се гради идентитет, а не со турбофолк во Прилеп“, беше дел од излагањето на Митре Велјановски. Тој бараше да не се силува историјата.

„Кое знаме го барате? Тоа што беше изгласано од цел Парламен�� или тоа што го сменивте преку ноќ под притисок на Грција“, реплицираше Илија Димовски и додаде дека Владата поставила 30 јарболи со огромни знамиња.

„Колеги, има ли шанси да се разбереме“, беше прашањето на Велјаноски, кое најдобро ја илустрираше и вчерашната втоа расправа за „Скопје 2014’.