Владата, сепак, во барокен стил

Објектот на „Илинденска“ бб ќе се поднови по идеја на авторите Жарко Чаушевски и Филип Богатинов

Деспина Трајковска


Новата владина фасада ќе биде барокна, одлучено е вчера доцна попладне. Објектот на „Илинденска“ бб ќе се поднови по идеја на авторите Жарко Чаушевски и Филип Богатинов. Вака вчера одлучикомисијата која, сепак, на ова идејно решение не му ја доделипрвата награда, туку одлучи да го откупи делото. Од владината служба вчера не сакаа да кажат кој го имал пресудниот збор за тоа како ќе се реконструира препознатливиот застаклен владин објект. Велат дека комисијата била составена од стручни лица, а меѓу нив не бил ниту еден од звучните автори кои досега дале свој печат во „Скопје 2014“.

Од службата не појаснија зошто не е избрано првонаградено дело, ниту пак се доделени втора и трета награда, туку е одлучено само да се откупи трудот на Чаушевски и Богатинов.

„Сега следува втората фаза од постапката, изработка на основен проект. Согласно законите и роковите очекуваме со теренска реализација да започнеме негде на лето“, ни' изјави Васил Доневски, директорот на владината Служба за општи и заеднички работи. Дополни дека во натамошните постапки на изработка на проектот, освен авторите на избраниот терк за фасадата, ќе биде вклучен и авторот на зградата Петар Муличковски. Тој, како што тврдат, прифатил да биде во улога на консултант, откако со образложение дека не ги поседува потребните лиценци надлежните го одбија неговото барање реконструкцијата да се работи по негов проект и без спроведување на конкурс.

Инаку, изборот на барокната фасада, во случајов, се поклопува и со мислењето на граѓаните кои две недели имаа можност да се изјаснат во каква зграда би сакале министрите да работат во иднина. Во владината интернет анкета, која заврши минатата седмица, барокното идејно решение убедливо беше прогласено за најприфатливо од страна на граѓаните. Тоа зад себе остави четири предлози, дел од нив модернистички, изведени во стакло, слично на постојната зграда.

Главната причина за промена на фасадата на владината зграда, како што тврдат надлежните, е застареноста на сегашната. Велат и дека е шпекулација дека намерата била владината зграда да се вклопи во амбиентот на „Скопје 2014“. Се тврди дека главната причина е што е нагризана изолацијата.

Подновата на фасадата на „Илинденска“ бб ќе биде прва интервенција откако објектот е изграден во 70-тите години на минатиот век. Досега, единствено се интервенирало во внатрешноста на владиниот дом.

Авторите творци и на „Водовод“ и паркот на Тоше

Авторскиот тандем на избраната владина фасада веќе е присутен со свои дела во Скопје. Филип Богатинов е автор на идејното решение по кое е изграден паркот во чест на Тоше Проески во скопската населба Ново Лисиче. Жарко Чаушевски е пак авторот на новата административна зграда на ЈП „Водовод и канализација“ што се гради во Скопје.

И оваа зграда е стилска, односно со барокна фасада.