09.02.2012, 14:52 Хеликоптерите носат храна и лекови до завеани села
Хеликоптери на воздухопловниот ВИНГ на АРМ и денеска продолжуваат со акцијата за снабдување на населението во отсечените делови од Македонија
Како што изјави министерот за одбрана Фатмир Бесими, кој присуствуваше на акцијата на снабдување на населението од Ружинце, Алашевце, Гошинце и Лукарска Мала, со денешната акција ќе бидат опфатени повеќе од 20 места во општините Липково, Крива Паланка и Мариовско, како и Малино и Брест во Скопска Црна Гора.
- Повеќе населени места се снабдуваат со храна и лекови со цел да му се помогне на локалното население кое поради снегот е блокирано. Ова е една од задачите што АРМ ја има, а тоа е да му се помогне на цивилното население во вакви услови, рече министерот Бесими.
Тој додаде дека покрај овие активности, во повеќе населени места Армијата му помага на населението и со механизација за расчистување на патиштата каде е тоа можно. Тој посочи дека во оваа акција во која е вклучена и Армијата се води на ниво на Влада, а вклучени се сите релевантни институции кои може да помогнат.
Командантот на воздухопловниот ВИНГ потполковник Кире Колевски информира дека храната во износ од пет тони брашно, 500 литри зејтин, 60 пакети со хигиенски материјали и неколку пакети со лекови ќе бидат доставени со шест лета до населените места во посочените општини при што е ангажиран целокупниот транспортен квадрон и дел од Командата. Храната е обезбедена од армиските резерви, од Центарот за управување со кризи и од Црвениот крст.
Во текот на вчерашниот ден хеликоптерите на воздухопловниот ВИНГ на АРМ пренесоа помош во храна и лекови за жителите на Караџица, во Скопска Црна Гора, Црн Врв, скопско Елово, Патишка Река и Држилово.
|
