09.02.2012, 15:10 Волебек бара да се најдат запалувачите
Меѓуетничките проблеми се уште не се минато во Македонија, смета високиот комесар за малцинства на ОБСЕ
Високиот комесар на ОБСЕ за национални малцинства, Кнут Волебек, денеска од Собранието ја повика власта да се справи со предизвикувачите на меѓуетничките и меѓуверски инциденти што, според него, покажале дека тензиите на овој план не припаѓаат на минатото и дека, доколку не се спречат, можат да го загрозат општеството. Нарекувајќи ги палењата на црквите, на знамињата, навивањата и говорот на омразата како феномени, тој оцени дека клучно прашање што треба да се постави овде е - што значи сето тоа за меѓунационалните односи во Македонија. Тој притоа забележа дека не се потребни палење на знамиња и сквернавење верски објекти за да има дебата за вакви појави, па ја повика Владата да реши уште едно жешко прашање - да воведе интегрирано образование како најдобар начин за превенирање на тензии во мултиетничките општества.
- Треба да се преземат мерки во политиката, во подобувањето на законите, медиумите и во социјална интеграција. Образованието е високо релевантно во превенцијата од ескалирањето на инцидентите. Можев да видам зголемена тенденција во однос на сепарирањето по етничка линија, особено во постконфликтни општества. Сето ова може потенцијално да претставува закана по социјалната кохезија, оцени Волебек. (С.Ј.)
|
