Семејството Кузмановски не живее во луксуз

По „Детонатор“, во Кочани и во Виница полесно се дише. Кочанци раскажуваат кои се приведените сограѓани

Иван Бојаџиски



Семејство од средна класа, кое не живее раскошно и во луксуз. Вака во Градот на оризот го опишуваат семејството на Горан Кузмановски, кој беше приведен во последната акција „Детонатор“, и неговата сопруга, пратеничката Бети Кузмановска од редовите на ВМРО-ДПМНЕ.

„Тие поседуваат семејна куќа од родителите на Горан во која живеат двајцата браќа со семејствата и нивната мајка. Ништо луксузно, ништо специјално. Бети Кузмановска беше избрана за советник од ВМРО-ДПМНЕ во два мандата, а во еден период беше и претседател на Општинскиот совет. На последните парламентарни избори таа се најде на добитното место во тројката и стана пратеничка“, ни кажа граѓанин на Кочани, кој е добро упатен во политичките состојби на својот град.

Сопругот на пратеничката пред една година, наводно, бил фатен во шверц со алкохолни пијалаци на кои лепел лажни бандероли на брендирани марки, па евтино купеното го продавал по значително повисоки цени. Нема информации како завршила оваа афера во судските органи. Една година пред неговата сопруга да стане пратеничка, тој стариот автомобил со заменил со ново луксузно возило, раскажуваат кочанци.

Во Кочани и во Виница се чувствува големо олеснување по успешната акција на македонската полиција под името „Детонатор“ во разбивањето голема криминална група од овие два соседни града.

Кочанскиот градоначалник Ратко Димитровски вели дека сите граѓани на овој град ја поздравуваат акцијата на МВР. На наше прашање зошто досега не се реагирало, Димитровски вели дека тие како локална власт немале ингеренции во оваа област.

„Кај нас директно никој не се имаше пожалено на насилство, на тортура. Некои процеси стигнаа и до суд по тужби на граѓани против одделни членови на бандите, но сведоците не се појавуваа и целата работа немаше завршница. И сега има судски процеси меѓу членови на двете банди, за тоа имаме само неформални информации, бидејќи ние, како општинско раководство, не добивавме никакви информации од надлежните органи. Се обраќавме до Општинското јавно обвинителство и од судот со барање информации за процесите кои таму се одвиваат во однос на криминалните структури во градот, ама за тоа не добивавме повратен одговор“, објаснува Димитровски.