А оставка, пратеничке?

Пратеничката на ВМРО-ДПМНЕ Кузмановска, која се прослави со легендарната изјава дека се гордее што е послушник на Никола Груевски, не навестува оставка

Светлана Унковска


Гордата послушничка на премиерот Никола Груевски, по што пратеничката на ВМРО-ДПМНЕ Бети Кузмановска остана запаметена, деновиве изјави дека не гледа причина да даде оставка на функцијата пратеник и на тој начин да понесе морална и политички одговорност за криминалните активности на нејзиниот сопруг.

Пратеничката на владејачката партија со ваквата изјава покажува дека функцијата народен избраник нема ништо заедничко со дадената доверба од истите граѓани кои нејзиниот сопруг, според кажувањата на полицијата, ги тероризирал.

Во акцијата на МВР „Детонатор“ покрај голем број роднини на пратеници од власта, во притвор заврши и сопругот на Кузмановска, а групата е осомничена дека ги тероризирала сите оние фирми кои ги одбивале услугите на нивната агенција за обезбедување. Но, за ваквите криминални активности на нејзиниот сопруг Кузмановска не гледа никаква поврзаност со неа и не смета дека сама треба да си поднесе оставка како чин на морална одговорност.

Четириесет годишната пратеничка Кузмановска е родена во Штип а живее во Кочани. По професија е дипломиран професор по предучилишно воспитување, а дипломата ја добила на штипскиот универзитет „Гоце Делчев“, каде и магистрирала во областа дидактика. Пред да седне во пратеничката фотелја била советник во општина Кочани од редовите на ВМРО-ДПМНЕ.

Таа пред две години од позицијата на локален советник инсистирала да се разреши командирот на полициската станица, поради криминалот во општината. Кузмановска во Парламентот се прослави најнапред со легендарната изјава дека самата лично се гордее што е послушник на нејзиниот партиски шеф, Никола Груевски која ја кажа лани во август, само неколку месеци по изборите. Пред две недели, пак во истиот стил на горд послушник, на собраниската дебата за годишната програма за одбележување на важни настани цинично предложи во годишната програма за одбележување на важни настани да влезе и одбележувањето на роденденот на лидерот на СДСМ Бранко Црвенковски.

„Можеби ќе беше во ред ако предложевме амандман за прогласување државен празник 50 години од раѓањето на Бранко Црвенковски. А јас ќе ве замолам вие да побарате од Црвенковски виски и малку кокаин, за да прославиме подобро“, рече тогаш Кузмановска.

Меѓутоа нито една од овие нејзини изјави не можат да бидат покритие за нејзината морална одговорност, но уште помалку треба да претставуваат доволен кредит за партиските органи на владејачката ВМРО-ДПМНЕ и на нејзиниот шеф Груевски да не и' побараат одговорност и да поднесе оставка.

Во светот, пак, бројни примери покажуваат дека во случај на скандали во кои се вмешани потесни членови на семејствата на политичари, гневот на јавноста се ублажува со оставки. Притисокот за оставка доаѓа од внатрешни структури на партиите кои се загрижени за разнишаниот углед на нивната група и поените што ќе ги собере противничката страна портретирајќи ги како блиски до криминалот. Сопругата на еден претседателски кандидат во САД имаше ангажирано куќна помошничка која работела на црно во САД, а медиумите го растргнаа претседателскиот кандидат. Но, тоа не е случај и во Македонија каде оставката станува мислена именка.

Така, во ВМРО-ДПМНЕ велат дека угледот на нивната пратеничка и на целата пратеничка група не е тема за внатрепартиска политичка дискусија. „Нема најава дека ќе имаме некаков состанок за Кузмановска“, вели нејзиниот колега од пратеничките клупи Илија Димовски.

Опозициските партии вчера реагираа на последните случувања во Кочани. Нивните коментари се дека случајот во Кочани е всушност внатрепартиско препукување во борбата за преземање на бизнис интересите со агенциите за обезбедување. Социјалдемократите велат дека македонските граѓани перманентно се жртви на криминални банди, заплашувања и своевидно државно рекетарство, под директно спонзорство на ВМРО-ДПМНЕ. СДСМ тврди дека источна Македонија е под заложништво на цела криминална структура која очигледно не само што била толерирана од страна на судството и полицијата, туку и политички била заштитена од власта.

„Пресметката со криминалните банди е всушност борба во ВМРО-ДПМНЕ за превласт врз приватните агенции за обезбедување и контрола над партискит�� обезбедувачи. Јавна тајна е дека веќе подолг временски период постои судир меѓу шефот на тајната полиција и личниот телохранител на премиерот“, вели потпретседателот на СДСМ Гордан Георгиев. Криминалот, како што посочи Георгиев, е толериран од полицијата.

Оставка никој не споменува, веројатно поради фактот што таква пракса во Македонија не постои, а уште поверојатно е дека меѓу пратениците е присутно непишано правило на солидарност, се разбира на штета на оние што ги избираат и им даваат доверба да ги претставуваат во народниот дом.